Marrëveshje për koalicion në Itali – Dyshja populiste arrin dakordësi, programi sfidon rregullat e BE
Dy partitë populiste në Itali kanë nënshkruar një marrëveshje për të formuar koalicionin qeverisës, duke premtuar rritje të shpenzimeve dhe shtuar shqetësimet për një përplasje me Bashkimin Europian, pavarësisht tërheqjes së propozimeve më radikale.
Kontarat mes Ligës dhe Lëvizjes 5 Yjet, dy partitë që fituan pjesën më të madhe të vendeve në Parlament gjatë zgjedhjeve të 4 Marsit, kërkon ende miratim nga anëtarët e partive, nëpërmjet një votimi që do të zhvillohet ditën e Diel.
Dokumenti i arritur pas 2 muajsh të ngërçit politik në ekonominë e tretë më të madhe të Eurozonës, bën thirrje për reduktime tatimore që arrijnë miliardat, shpenzime shtesë në mirëqenie dhe riorganizimin e reformës së pensioneve.
Dakordësia përfundimtare hodhi poshtë propozimin që do të përbënte sfidën më të madhe ndaj rregullave fiskale të Bashkimit Europian dhe qetësoi investitorët duke përjashtuar opsionin e daljes nga valuta europiane.
Një projekt i marrëveshjes për koalicion, i parë nga Reuters, bënte thirrje për Bashkimin Europian që të krijonte një hapësirë fiskale për Italinë, duke ndryshuar formulën që përdoret për të llogaritur barrën e borxhi të vendit.
Versioni përfundimtar e hodhi poshtë këtë propozim, megjithatë kërkoi një rishikim të rregullave fiskale të Bashkimit Europian, duke nisur sfidën më të madhe politike të bllokut, që prej Brexit.
Euro ra pas zhvillimeve në Itali, duke i’u drejtuar javës së 5-të radhazi të rënies kundër dollarit, që është periudha më e gjatë që prej 2015-ës. Yieldi i titujve 10-vjeçar të qeverisë italiane shënoi nivelin më të lartë në 7 muaj, ndërsa indeksi i titujve të kapitalit në Itali, ra me 1%.
Dakordësia përfshin gjithashtu një plan për të titullizuar borxhin që Qeveria i detyrohet kompanive dhe individëve, duke krijuar tituj afat-shkurtër që mund të tregtohen.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.