Marrin pensione nga familjarët e vdekur – Shkon në 100 numri i të paditurve në Gjykatë

Ministria e Punës ka proceduar 100 padi në Gjykatën Themelore të Prishtinës për persona që dyshohen se përfitonin pensionin nga familjarët e vdekur.

Ministria e Punës dhe e Mirëqenies Sociale (MPMS) tashmë ka filluar t’i pastrojë listat e përfituesve të paligjshëm nga skema e pensioneve.

Zëdhënësi në këtë Ministri, Musa Demiri, në një përgjigje me shkrim për “Zërin” ka treguar se vetëm gjatë vitit të kaluar janë shënuar 6118 raste të pezulluara.

“Ministria e Punës dhe e Mirëqenies Sociale për çdo muaj, pasi kryhet pagesa e pensioneve, harton raportin për numrin e të pezulluarve nga skemat pensionale. Numri i pezullimeve është proces i përhershëm. Gjatë vitit 2017 ka pasur 6118 raste të të përjashtuara”, thuhet në përgjigjen me shkrim të Ministrisë.

Arsyeja e padisë nga Ministria është për faktin se shumë familjarë nuk kanë pranuar ti kthejnë pensionet e të vdekurve në buxhetin e shtetit.

“MPMS-ja pas refuzimit të familjarëve të pensionistit të vdekur për t’i kthyer mjetet, që janë pasurim pa bazë, ka proceduar rreth 100 padi në gjykata”.

Derisa të marri një vendim Gjykata për këto raste të paditura, Ministria thotë se nuk mund të llogaritet një shifër konkrete se sa dëm i është shkaktuar buxhetit të shtetit nga këto përfitime të paligjshme.

E.Z/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.