Masat për aksidentet rrugore – Tola: 90% të rasteve vijnë nga gabimet njerëzore
Rreth 90% të rasteve të aksidenteve rrugore vijnë nga gabimet njerëzore dhe vetëm një përqindje shumë e vogël është sinjalistika dhe kushtet e rrugës.
Kështu ka deklaruar në një prononcim për mediat nga Lezha, Drejtori i Policisë Rrugore Mitat Tola. Tola paralajmëroi masa të rrepta ndëshkuese ndaj atyre që abuzojnë me shpejtësinë, pijet alkoolike e parakalimet e gabuara
“Aksidentet rrugore në 90% të rasteve vinë nga gabimet njerëzore dhe të drejtuesve të mjeteve. Një % shumë e vogël është sinjalistika dhe kushtet e rrugës. Gjithmonë në aksidentet rrugore, rruga ose e përkeqëson ose e ndihmon aksidentin. Të themi , ne do të fokusoheni bashkërisht tek shkeljet që janë, tejkalimi i shpejtësisë, përdorimi i alkoolit , mospërdorimi i rripit të sigurimit, mosvendosja e kaskës . Analiza më të detajuara , sa faj ka rruga e sinjalizimi janë për tu bërë në kohë me të mëvonshme. Në momentin e parë , ne duhet të fokusohemi te monitorimi i trafikut, kontrolli i rrymave të trafikut, tejkalimi i shpejtësisë”.
Drejtuesit e policisë rrugore u bëjnë thirrje drejtuesve të mjeteve të tregohen të kujdesshëm duke bërë të ditur se janë nën vëzhgim të vazhdueshëm.
“Kemi deklaruar në media që kemi nxjerrë pothuajse gjithë radaret që kemi të disponueshëm të cilët i kemi vendosur si në mënyrë manuale, ashtu edhe në mënyrë automatike. Drejtuesit e mjetit duhet të dinë që janë nën përgjim të vazhdueshëm nga shërbimet e policisë rrugore , por edhe në shtëpi do tu shkojë pas një dite, pas një jave, pas një muaji , një fletë gjobe ku ai është kapur duke tejkaluar shpejtësinë , është kapur duke përdorur celularin ose nuk ka vendosur rripin . Le të mbetemi këtu. Rruga dhe elementët e tjerë janë në një fazë të mëvonshme”.
Drejtoria e Policisë Rrugore, nisur edhe nga numri i lartë i aksidenteve, i ka dyfishuar patrullimet, lëvizshmërinë e patrullave, ka ndëshkuar dhe vazhdon të ndëshkojë parakalimet e gabuara të drejtuesve të mjeteve që në thelb, sipas Tolës, janë një nga shkaqet kryesore të ndodhjes së aksidenteve.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.