“Masat shtrënguese deri në janar”, Merkel: Po rriten infektimet nga COVID. Vaksina mund të mbërrijë për Krishtlindje

Kancelarja Angela Merkel tha se Gjermania me shumë mundësi do të mbajë masat e karantinës kundër koronavirusit deri në Janar dhe shtoi se vaksinat mund të arrijnë përpara Krishtlindjeve dhe do t’i ofrohen stafit mjekësor. Merkel ra dakord me liderët e 16 shteteve federale të Gjermanisë këtë javë që të zgjasë dhe shtrëngojë masat e karantinës deri më 20 Dhjetor, por  të lehtësojë rregullat për Krishtlindje, në mënyrë që familjet të festojnë.   Kancelarja tha se rritja e rasteve me koronavirus është ende shumë e lartë dhe numri i vdekjeve përbën shqetësim.

“Masat e aplikuara më 28 Tetor do të qëndrojnë deri më 20 Dhjetor, për momentin. Megjithatë, qeveria dhe shtetet federale supozojnë se për shkak të numrit të lartë të të infektuarve, këto masa mund të qëndrojnë deri në Janar. “

 Numri i rasteve të konfimruara në Gjermani u rrit me 22,268 në 24 orët e fundit, duke kaluar 983,000, ndërsa vdekjet u rritën me 389 në 15,160.   Shefi i stafit të Merkel tha se rregullat që kufizojnë kontaktin social mund të duhet të zgjaten më tej. Helge Braun tha se Dimri do të jetë i ashpër dhe masat do të zgjasin deri në muajin Mars.  Sipas tij, deri më atëherë do të jenë vaksinuar më shumë njerëz dhe pranëvera do të ndihmojë në uljen e normës së infeksionit. Merkel tha se vaksinat mund të mbërrijnë përpara Krishtlindjeve.

 “Është e mundur që vaksinat të mbërrijnë përpara Krishtlindjeve dhe ne ramë dakord që këto vaksina të mund të ofrohen tek mjekët dhe infermierët.”  

Gjermania vendosi një karantinë 1 mujore më 2 Nëntor për të parandaluar valën e dytë të koronavirusit. Nga data 1 Dhejtor, mbledhjet do të limitohen në 5 njerëz, por për Krishtlindje, ky numër do të rritet në 10.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.