Mashtrimi me kreditë e Fondacionit – 800 persona të prekur, në krye të skemës drejtoresha e degës

Skema e mashtrimit të vënë në jetë nga punonjëset e fonacionit Besa rezulton të ketë prekur rreth 800 persona, kredimarrës nga ky subjekt si dhe financues përmes shumash të konsiderueshme. Prokuroria ka zbardhur të dhëna të reja mbi hetimet mbi grupin që punonte pranë këtij fondacioni, i cili,  përmes kësaj skeme mashtrimi ka përfituar afërisht 3.7 milionë euro.

Nga hetimet e deritanishme është zbardhur se shtetasja Albana Imami, në pozicionin e drejtoreshës së njërës nga degët e filialit të fondacionit, kishte krijuar ketë skemë mashtrimi  dhe në bashkëpunim me personat e tjerë të ndalur kanë lëshuar kredi në mënyre fiktive dhe klientët që kanë përfituar.

Ndërkaq, klientët që kanë përfituar kreditë nuk janë paraqitur fare në zyrat e fondacionit në momentin e aplikimit për kredi. Dyshohet gjithashtu, se vetëm me anë të kartës së identitetit, qytetarë të ndryshëm kanë aplikuar për kredi të vogla, por në fakt punonjësit kredinë e firmosnin për shuma më të mëdha.

Ata paraqiteshin vetëm në momentin që disbursohej kredia, bënin tërheqjen e lekëve në banka dhe nga shuma e përfituar e kredisë, këta persona përfitonin 25 deri në 35% të shumës së kredisë dhe pjesa tjetër përfitohej nga Drejtoresha e degës, Oficeret e Kredisë dhe Sekserët që siguronin klientët dhe në përfundim të këtij procesi nga Drejtoresha e degës lëshohej një vërtetim fiktiv, sikur e gjithë shuma e kredituar ishte likuiduar nga klienti.

Shuma e kredive që janë dhëne nga ky staf, deri tani ka shkuar në vlerën 2 000 000 euro dhe në përditësimin e saj shkon në rritje.

Nga Drejtoresha e Degës, shtetasja Albana Imami janë marrë shuma të mëdha valute me interes nga persona të ndryshëm për të mbuluar këtë skemë mashtrimi, të cilat kapin vlerën deri në 1.7 milion euro.

Skema u denoncua nga drejtues të Fondacionit Besa, të cilët referuan në polici se një pjesë e stafit po siguronte përfitime të mëdha përmes mashtrimit. Ndërsa hetimet vijojnë për të zbardhur më tej skemën, janë arrestuar shtatë persona, punonjës të Fondacionit e sekserë, ndërkohë që një tjetër është në kërkim.

Këta shtetas në bashkëpunim me njëri-tjetrin kanë konsumuar elementet e veprave penale “Skemat mashtruese dhe piramidale”, “Vjedhja duke shpërdoruar detyrën”.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.