Mbërrijnë 350 ukrainas, Shqipëria hap dyert – Ministria e Brendshme: Kryesisht janë strehuar nëpër të njohur. Po përgatitet plan masash
Rreth 350 ukrainas që i janë larguar luftës në vendin e tyre janë strehuar deri tani në Shqipëri. E dhëna bëhet e ditur për Televizionin Scan nga burime zyrtare në Ministrinë e Brendshme, sipas të cilëve më së shumti janë vendosur nëpër të afërm apo të njohur. Burimet bëjnë gjithashtu me dije se po punohet mbi një plan masash në rast se do të ketë flukse të reja qytetarësh ukrainas të cilët u largohen tmerreve të luftës. Ndërkaq mësohet se një pjesë e vogël e tyre kanë aplikuar tashmë për të përfituar statusin e mbrojtjes së përkohëshme.
Dhe duket se pranimi i tyre do të lehtësohet edhe më tej në vijim. Jo më larg se javës së shkuar, Këshilli i Ministrave ka miratuar një vendim i cili u jep mundësinë ukrainasve të qënëdrojnë deri në 1 vit në Shqipëri pa lejet përkatëse që detyron legjislacioni mbi të huajt. “Shtetasit e Ukrainës kanë të drejtë të hyjnë dhe të qëndrojnë pa leje qëndrimi në Republikën e Shqipërisë për një afat deri në 1 (një) vit. 2. Ngarkohen Ministria e Brendshme dhe Ministria për Evropën dhe Punët e Jashtme për zbatimin e këtij vendimi”, përcakton Vendimi i Këshillit të Ministrave i miratuar më 18 mars.
Në këtë mënyrë Shqipëria rreshtohet mes një liste të gjatë shtetesh të cilët kanë hapur dyert për ukrainasit.
Vlerësohet se deri tani rreth 3 milionë ukrainas kanë lënë vendin për shkak të pushtimit rus. Rreth 2 milionë prej tyre janë vendosur në Poloni, e cila deri tani ka mbajtur peshën kryesore për pritjen e tyre. Ndërkohë që qindra mijëra të tjera janë vendosur në shtete të tjera, si Poloni, Rumani, Hungari, Sllovaki apo Moldavi.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.