Mbështetje financiare për ekselentët, Rama: Heqim tarifën e studimit dhe japim bursë prej 1000 $ në vit
Për të gjithë studentët ekselentë që kanë zgjedhur degën e mësuesisë do të jepet mbështetje financiare nga shteti.
Gjatë një takimi me studentët e ekselencës kryeministri Edi Rama u shpreh se studentët e ekselencës nuk do të paguajnë tarifën e studimit, si dhe në të njëjtën kohë për ekselentët që kanë zgjedhur degën e mësuesisë do të jepet një burës në vlerën e 1000 dollarëve në vit, për çdo vit që studentët do të rezultojnë ekselentë.
“Kemi vendosur që për të gjithë nxënësit e ekselencës që janë pjesë e mësuesisë të ketë edhe një bursë vjetore prej 1.000 dollarë, e cila do të jepet muaj pas muaji dhe është një masë që do mbështesë studentët për nevojat e vitit shkollor duke qenë se jeni nxënës me rezultate të veçanta dhe me pasione e vullnete të veçanta. Së paku për të plotësuar nevojat për libra apo materiale të tjera mësimore të mos kërkoni nga prindërit por ti blini vetë”.
Më tej kryeministri Edi Rama i është referuar reformës në arsim e cila sipas tij po jep rezultatet. Ndërkohë që Rama është shprehur se do të ketë rritje të mëtejshme të pagave për mësuesit si dhe do të ketë trajnime të paguara nga buxheti i shtetit.
Për vitin akademik 2018-2019 janë regjistruar rreth 22 284 studentë në auditorët e universiteteve publike. Prej tyre rreth 260 studente me mesatare mbi 9 kanë zgjedhur mësuesinë këtë vit si profesion.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.