“Mbetjet” e Uraganit Ida në SHBA – Përmbytjet marrin jetën e mbi 44 personave në Verilindje
Përmbytjet kanë lënë të paktën 44 njerëz të vdekur në 4 shtete Verilindore, ndërkohë që mbetjet e uraganit Ida kanë shkaktuar reshje të rrëmbyera që kanë përmbytur linjat e metrove në New York City dhe pezulluar fluturimet. Në pjesë të mëdha të New Yorkut, New Jerseyt, Pensilvanisë dhe Connecticut, banorët kanë qëndruar mbi bodrume të përmbytura, pa energji elektrike, me çati të dëmtuara dhe kanë kërkuar ndihmë. Të paktën 13 persona humbën jetën në New York City, së bashku me 3 në zonën periferike Westchester.
Guvernatori i New Jerseyt, Phil Murphy shkroi në twitter se të paktën 23 persona kanë vdekur nga stuhia. Ndër viktimat, 3 janë gjendur në një bodrum në New York City. Presidenti i Shteteve të Bashkuara, Joe Biden deklaroi se gjendja e emergjencës është ekzistuese në New Jersey dhe New York dhe urdhëroi ndihma federale për reagimet lokale, për shkak të kushteve të vështira nga mbetjet e Uraganit Ida.
Rrugët e makinave u transformuan në rryma të ngjashme me lumenj, ndërkohë që reshjet e rrëmbyera bllokuan shoferët, pasi niveli i ujërave u rrit shpejtë. Rreshta të makinave janë gjendur të braktisura në rrugë. Shërbimi Kombëtar i Motit konfirmoi 2 tornado në Maryland, një në Annapolis dhe një tjetër në Baltimore. Dëmi vjen 3 ditë pasi Ida, një nga uraganët më të fortë që godet gjirin e Meksikës, arriti në Louisiana. Megjithatë, humbja e jetëve në Verilindje ishte shumë më e lartë se 9 vdekjet e lidhura me uraganin në Louisiana.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.