Mbi 2 milion të infektuar në Gjermani – Ndërsa vendi regjistron shifra rekord Merkel kërkon bllokime më të ashpra

Rastet totale të koronavirusit të Gjermanisë kapërcyen dy milion të Premten, ndërsa Kancelarja Angela Merkel kërkoi për shtrëngime “të rëndësishme” të kufizimeve për të ngadalësuar shkallën e infeksionit.

Vendi më i populluar i Bashkimit Europian shtoi edhe 22,368 raste të reja gjatë 24 orëve të fundit, tha agjencia shëndetësore e Gjermanisë Robert Koch (RKI), duke e çuar totalin që nga fillimi i pandemisë në 2,000,958.

Ai raportoi gjithashtu edhe 1,113 viktima të tjera nga Covid-19, duke e çuar numrin e përgjithshëm të vdekjeve deri në 44,994.

Ky moment i rëndësishëm vjen disa orë pasi Merkel bëri thirrje për frenim më të ashpër të jetës publike për të vendosur nën kontroll shpërthimin.

Në një takim të anëtarëve të lartë të partisë së saj të qendrës së djathtë CDU, Merkel tha se ajo dëshironte të çonte përpara bisedimet e krizës me udhëheqësit rajonalë “në javën e ardhshme”, thanë pjesëmarrësit për AFP. Ata e cituan atë të thoshte që virusi mund të ndalet vetëm me “masa shtesë të konsiderueshme”.

Ajo gjithashtu shprehu shqetësim në lidhje me llojin e koronavirusit që u shfaq kohët e fundit në Britani dhe që konsiderohet më ngjitës, duke thënë se njerëzit urgjentisht kanë nevojë të zvogëlojnë kontaktet e tyre shoqërore.

Gjermania doli më mirë se shumë fqinjët e saj në ditët e para të pandemisë, por është goditur rëndë nga një valë e dytë pavarësisht se ishte në një formë mbylljeje që nga fillimi i nëntorit.

Merkel dhe udhëheqësit e 16 shteteve të Gjermanisë fillimisht u planifikuan të zhvillonin takimin e tyre të ardhshëm në 25 Janar për të bërë një vlerësim të masave aktuale.

E përjavshmja Der Spiegel raportoi se midis opsioneve më të ashpra që po konsideroheshin ishin kontrollet kufitare, kërkesat për të mbajtur maska ​​me cilësi të lartë FFP2 në disa vende dhe shtimi i njerëzve që punojnë nga shtëpia. (AFP)

E . S / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.