Mbi 200 mln euro fitim në vit- Vlerësimet paraprake për TAP, në 2021, bilanci i parë
Gazsjellësi Trans-Adriatik që do të kalojë mes përmes Shqipërisë mund të regjistrojë një fitim neto prej 238 milionë eurosh pas vitit të parë të operimit, pra në 2021-shin, sipas vlerësimeve të një prej partnerëve të konsorciumit.
Në total, progresi në përfundimin e gazsjellësit fiksohet në 90%, ndërkohë që tubacionet janë shtrirë thuajse të gjithë, në masën 99% në pjesën tokësore. Pa u përfunduar mbetet vetëm pjesa nënujore, që do të lidhë Shqipërinë me brigjet e Puglias në Itali.
TAP ka filluar punën në 2016 dhe projektohet të përfundojë vitin e ardhshëm, kur edhe do të transportohet gazi azer për në Europë, përmes Shqipërisë. Janë 3500 kilometra tubacione që pritet të ulin ndjeshëm varësinë e Europës nga gazi rus.
Mesa duket nga vlerësimet paraprake, Tap është një projekt nga i cili fitojnë të gjithë; së pari Europa, që do të marrë gaz pa presionin dhe shantazhin e Rusisë, por edhe vetë konsorciumi që përbëhet nga 5 kompani të ndryshme globale. Edhe vendet nga ku do të kalojë, si Shqipëria do të korrin përfitim të madh nga gazsjellësi.
Roel Korkuti/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.