Mbi 3 mijë aplikime për ndihmën ekonomike – 6 mujori, rritet kërkesa për mbështetje financiare në Tiranë

Mbi 3 mijë aplikime janë regjistruar për ndihmën ekonomike dhe aftësinë e kufizuar vetëm në kryeqytet për 6 muajt e parë të viti. Referuar të dhënave zyrtare të Drejtorisë së Mbrojtjes dhe Përfshirjes Sociale në Bashkinë e Tiranës, konkretisht për periudhën Janar-Qershor 2020 kanë aplikuar për ndihmë financiare nga buxheti i shtetit 3140 individë,  ku pas aplikimit kanë përfituar 2882 familje, 289 invalidë me status jetimi, 94 invalidë viktima të dhunës, si dhe disa familje me tre,katër apo 5-njakë dhe familje kujdestare.

Në raport me 6 mujorin e parë të 2019, numri i aplikimeve është rritur me 329, kjo e ndikuar edhe nga situata e krijuar nga tërmeti i 26 nëntorit por edhe nga pandemia COVID-19. Ndërsa në shkallë vendi, sipas të dhënave zyrtare të Ministrisë së Financave, për periudhën Janar-Korrik 2020, janë shpenzuar për familjet në nevojë rreth 14.5 miliardë lekë apo 116 milionë euro.  Shifra ka pësuar një rritje me rreth 22.4 milionë euro krahasuar me të njëjtën periudhë të vitit 2019,  por me diferencë të lartë edhe me vitet paraardhëse.

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.