Mbi 38 mijë shqiptarë aktivë në fondet e investimeve – AMF: Asetet e tregut arritën në rreth 750 milionë dollarë në 2021, rritje 11%
Viti 2021 ka shënuar shtim rekord të qytetarëve shqiptarë që I drejtohen fondeve të investimeve për të përfituar më shumë nga kursimet e tyre. Autoriteti i Mbikëqyrjes Financiare raporton se rritje ka shënuar si vlera e aseteve të fondeve, ashtu dhe numri i personave që po i drejtojnë sytë nga kjo formë investimi.
Ndërsa astetet neto të tregjeve të fondeve të investimeve kanë arritur vlerën rreth 750 milionë dollarë, numri i personave që kanë investuar në to ka kaluar kuotën 38 mijë.
Fondi i Investimit është një nga format e sipërmarrjeve të investimeve kolektive (SIK), me pjesëmarrje të hapur, e krijuar në bazë të një kontrate nëpërmjet ofertës publike të kuotave.
Sipas analizës së të dhënave për tregun e fondeve të investimeve në 30.09.2021, vlera neto e aseteve të fondeve, arriti rreth 75.15 miliardë lekë me një rritje prej 7,7 miliardë lekë, rreth 77 milionë dollarë, ose 11.49%, krahasuar me 31.12.2020.
Autoriteti i Mbikëqyrjes Financiare bën me dije se ky treg dominohet kryesisht nga investimet në Obligacione Qeveritare, të cilat përbëjnë 64.67% të aseteve të fondeve, me një rritje prej 5.59% krahasuar me 31.12.2020.
Numri i anëtarëve që kanë investuar në Fondet e Investimit më 30.09.2021 është 38,015 me një rritje prej 16.41% krahasuar me 31.12.2020.
Gjatë periudhës 30.09.2021, në tregun e fondeve të investimeve ushtruan aktivitetin e tyre nëntë fonde investimi, mes të cilëve pjesën kryesore e zënë: Fondi i investimeve “Raiffeisen Prestigj”, “Raiffeisen Invest Euro”, “Raiffeisen Vizion” dhe “Raiffeisen Mix” të administruara nga shoqëria “Raiffeisen Invest”, fondi i investimeve “Credins Premium” nën administrimin e shoqërisë administruese “Credins Invest”.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.