Mbi 900 gjoba për linjat urbane në Tiranë – Janar-Gusht 2021/ Shkeljet më të mëdha në frekuencën e orareve

Në 8 muajt e parë të vitit, Agjencia e Mbrojtjes së Konsumatorit pranë Bashkisë Tiranë ka vendosur në 905 gjoba në total në shërbimin e transportit publik urban në kryeqytet.  Të dhënat më të fundit janë deri në muajin Gusht ku gjobat janë vendosur për shkak të shkeljeve të ndryshme në frekuencën e linjave të transportit, zbatimin e kontratës dhe shpërndarjen e biletave.

Referuar të dhënave, shkeljet më të mëdha janë bërë në moszbatimin e frekuencës nga linjat urbane, çka ka bërë që shërbimi të mos jetë në nivelin e duhur për qytetarët dhe iu është dashur të presin më shumë në stacione.  Numri më i lartë gjobave është vendosur në Korrik, ndjekur nga dy muajt pasardhës. Së fundmi, për shkak të shkeljeve dhe abuzimeve me oraret si dhe shërbimin jo të duhur të ofruar ndaj qytetarëve. Bashkia e Tiranës vendosi të zgjidhë në mënyrë të njëanshme kontratën me linjën publike urbane “Unaza”, duke i hequr licensën operatorit të shoqërisë “Ferlut” sha.

Në kryeqytet funksionojnë 16 linja të transportit publik,  numri total i stacioneve është 451 dhe pritja mund të variojë nga 3 deri në 13 minuta sipas linjave të autobusëve dhe orarit (orar piku ose orar normal). Transporti publik urban përdoret mesatarisht nga rreth 200,000 persona në ditë ku pjesa më e madhe, rreth 64.7%, udhëton me biletë dhe një pjesë më e vogël përdorin abonetë, librezat etj.

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.