Mbledhja e parë zyrtare(VIDEO)/Vendimet nga “Viti i Skënderbeut”, ndihma për SHBA, godinat e drejtësisë te kompetencat e ministrive

Në mbledhjen e parë, menjëherë pas betimit në Presidencë, kabineti qeveritar është mbledhur me një listë të gjatë vendimesh. 2 prej vendimeve lidhen me vitin 2018 që do të shpallet “Viti I Skënderbeut”. Për këtë qëllim, një prej vendimeve parashikon ngritjen e një komisioni të posaçëm që do të merret me organizimin e veprimtarive.

Ndërkohë, në listën e vendimeve është edhe ai për procedurat për zgjedhjen e kandidaturave për anëtarë të Komisonit të Prokurimit Publik ndërsa zyrtarizohet kalimi në pronësi e ish godinës së Lidhjes së Shkrimtarëve nga Ministria e Kulturës te te organet që do të realizojnë procesin e rivlerësimit të gjyqtarëve dhe prokurorëve.

Për këtë qëllim, një vendim parashikon mbulimin e shpenzimeve të rikonstruksionit të godinës.

Ndërkohë, në listën e vendimeve është edhe ai për formën elektronike të certifikatave, njoftuar më herët nga kryeministri Edi Rama.

Një vendim tjetër është ai për akordimin e një ndihme financiare për qeverinë e Shteteve të Bashkuara të Amerikës në kuadër të lehtësimit të pasojave të dëmeve të shkaktuara nga uragani “Irma”.

Ndërkohë, 13 vendime të tjera  janë ato që përcaktojnë fushën e përgjegjësisë shtetërore të dikastereve të reja.

Në total, janë 23 vendime të shqyrtuara nga qeveria.

Ndërkohë, edhe faqja e Këshillit të Ministrave ka pasqyruar menjëherë ndryshimet në përbërjen e kabinetit qeveritar duke zëvëndësuar ministrat e qeverisë së para 25 qershorit me ata të pas 25 qershorit.

SCAN  

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.