Mbledhje me forcë e borxhit doganor – Dogana e Tiranës nis procedurat për rreth 30 kompani

Dogana e Tiranës ka nisur procedurat e mbledhjes me forcë të borxheve për rreth 30 kompani.

Përmes një kërkese të depozituar në Qendrën Kombëtare të Regjistrimit, Administrata Doganore ka kërkuar njoftimin e nisjes së kësaj procedure, pasi ka ezauruar tashmë rrugët e tjera.

Pjesa më e madhe e borxheve janë krijuar nga këto subjekte në vitin 2016, ndërkohë që shumë prej tyre përballen edhe me penalitete e kamatvonesa në shifra të konsiderueshme.

Në shpalljen e publikuar nga administrata doganore bie në sy se gjobat nisin nga 100 mijë lekë, për të arritur deri më 2.3 milionë lekë.

Një pjesë e mirë e borxhit përbëhet nga penalitetet dhe kamatvonesat, të cilat në një pjesë të mirë të rasteve arrijnë nivelin e 1 milionë lekëve. Ndërkohë që nuk mungojnë as penalitetet e rënda, duke parë se një prej kompanive debitore është ngarkuar me 11 milionë lekë detyrime të kësaj natyre.

Sipas nenit 280 të kodit doganor, për vjeljen e detyrueshme të borxhit, vendimet e marra nga administrata për rikuperimin me forcë të borxhit bëhen tituj ekzekutivë menjëherë sapo ato i njoftohen debitorit.

Kodi parashikon gjithashtu që ekzekutimi i këtyre titujve  mund të bëhet edhe nga strukturat e mbledhjes me forcë të detyrimit pranë administratës doganore.

Lorenc Rabeta/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.