Mbretëria e Bashkuar do të deportojë europianët nëse nuk aplikojnë për statusin
Qytetarët e Bashkimit Europian që jetojnë në Mbretërinë e Bashkuar do të dëbohen pas Brexit nëse nuk do të kenë aplikuar për statusin e vendosur në kohë, pohoi Ministri i Zyrës së Brendshme Brandon Lewis.
Qytetarët e Bashkimit Europian në Mbretërinë e Bashkuar kanë afat deri në fund të vitit 2020 që të regjistrohen për statusin e vendosur, i cili do t’u japë atyre të njëjtat të drejta që gëzojnë aktualisht në rast se Britania del nga blloku pa një marrëveshje.
“Nëse qytetarët e BE-së nuk janë regjistruar deri atëherë dhe nuk janë të justifikuar në mënyrë të duhur, do të zbatohen rregullat e aplikueshme të imigracionit,” është shprehur Lewis për gazetën gjermane Die Welt.
Si i tillë, shtoi ai, ata do të jenë “përgjegjës për ndjekjen penale për banim të paligjshëm dhe do t’i nënshtrohen masave të zbatimit, ndalimit dhe deportimit”.
Rreth 3.6 milion qytetarë të BE banojnë në Mbretërinë e Bashkuar, sipas shifrave të fundit nga Zyra për Statistika Kombëtare.
Që nga 31 gushti 2019, më shumë se 1.3 milion qytetarë të BE-së dhe familjet e tyre kanë aplikuar në Skemën e Zgjidhjes, tregojnë shifrat e qeverisë britanike.
N.Xh / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.