Mbyllen fluturimet nga Rinasi me Italinë, s’ka më as tragete drejt porteve! Priten masat për transportin urban. Balluku: Për anijet tregtare, asnjë lloj bllokimi

Të gjitha fluturimet ajrore dhe udhëtimet detare drejt Italisë dhe nga Italia drejt Shqipërisë nuk do të zhvillohen më duke nisur nga dita e sotme. Përjashtim bëjnë vetëm anijet tregtare të cilat transportojnë mallra për të cilat nuk ka asnjë lloj bllokimi.

“Në kuadër të masave të marra nga qeveria për përballimin e situatës së krijuar nga shfaqja e rasteve me Covid 19 ju mbajmë të informuar sa i përket transportit ajror dhe detar. Pas vendimi të marrë nga shteti italian dhe deklaratës së bërë nga kryeministri Conte për shpalljen e Italisë si zonë të kuqe jemi të detyruar dhe ne për marrjen e masave me ndërprerje fluturimesh. Të gjithë aeroportet italiane që kishin mbetur të hapura për operime si ai i Romës apo Barit nuk do të jenë më të aksesueshme.

Avioni i fundit është ulur në 10 e gjysëm me 64 paagjerë që kanë kaluar të gjithë në kontroll mjekësor dhe janë regjistruar nga grupet e MSH-së. Avioni tjetër është nisur në 11:40 dhe këtu ndërpriten të gjithë fluturimet. Ju bëj me dije se është shqetësim i shfaqur nga autoritetet italiane. Në rastet kur do të vendosen për të tërhequr nënshtetasit e tyre nga Republika e Shqipërisë apo pasagjerë të tjerë, do të jetë e mundur vetëm nëse avionët do të aksesojnë Shqipërinë pa pasagjerë. Avionë të cilët vijnë bosh nga Italia pa pasagjerë sepse nuk do të lejohen të vijnë më nga ajri në Shqipëri dhe këto avionë bosh mund të marrin pasagjerë për t’i dërguar në Italia.

Sonte nisen tragetet e fundit drejt italisë. Pas këtij itinerari nga të dy portet nuk do të ketë udhëtime të tjera në drejtim të Barit apo Brindizit.

Të gjitha anijet tregtare të cilat kanë si objekt të tyre tregtimin e mallrave nuk kanë asnjë lloj bllokimi për Republikën e Shqipërisë. Do të nisen nga portet tona dhe sa i përket personelit do të jenë nën kontrollin e stafeve të ministisë së Shëndetësisë që janë vendosur në porte” tha ministrja e Infrastrukturës Belinda Balluku.

Gjatë ditës së sotme pritet që të merren edhe vendime në lidhje me transportin urban qytetas dhe ndërqytetas.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.