Mbyllen sërish shkollat e rihapura disa ditë më parë! – Korea e Jugut nga ‘rast suksesi’ tek ‘vala e dytë’
Një rritje në rastet e koronavirusit e detyroi Korenë e Jugut të mbyllte qindra shkolla që ishin rihapur vetëm disa ditë më parë.
Disa shkolla rifilluan mësimin javën e kaluar, me shumë masa paraprake për të zvogëluar shkallën e përhapjes së infeksionit. Shkollat u dezinfektuan dhe nxënësit u nënshtruan kontrolleve të temperaturës, mbanin maska për fytyrën dhe ruanin distancën sociale. Barrierat plastike gjithashtu ndanin studentët ndërsa hanin dhe studionin, sipas Korea Times.
Por Qendra e Koresë për Kontrollin dhe Parandalimin e Sëmundjeve (KCDC) raportoi 79 raste të reja. Prej tyre, 69 u raportuan në një qendër në Bucheon, raportoi Agjensia e Lajmeve Yonhap.
Ky lajm bëri që 838 shkolla të vendit të shtyjnë rihapjen dhe të vazhdojnë me mësimin në distancë, tha Korea Times.
Koreja e Jugut është shpallur si një nga vendet e pakta që i është përgjigjur mirë sfidës së pandemisë, për shkak të testimit të përhapur, gjurmimit të kontaktit, karantinës dhe bllokimit. Që nga e shtuna, vendi kishte raportuar 11,441 raste dhe 269 vdekje, sipas të dhënave nga Universiteti Johns Hopkins.
Por kjo valë e re infeksionesh e detyroi qeverinë të rivendoste kufizimet.
D.B – SCAN
Burimi: Business Insider
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.