Mbyllet java e shtatë e aksionit anti-informalitet, Tatimet: Mblidhen mbi 1.8 mld lekë detyrime të prapambetura. Sa përfituan nga ligji i faljes?
Është mbyllur java e 7 e aksionit anti-infirmalitet. Kështu, Drejtoria e Përgjithshme e Tatimeve ka dhënë edhe rezultatet e këtij aksioni, pas mbylljes së javës së shtatë përmes një postimi në rrjetin social Facebook. Sipas DPT nga shërbimi i tatimpaguesve janë asistuar ballë për ballë 52 538 subjekte.
“ 8738 është numri tatimpaguesve të kontaktuar për ligjin e faljeve. Mbi 23 152 tatimpagues janë kontaktuar për të nxitur vetëkorrigjimin. 9591 është numri i vizitave këshilluese të përfunduara. Janë organizuar 52 takime me komunitetin e biznesit në territor. Qendra e thirrjeve ka vijuar të ofrojë shërbimet në numrin e vënë në dispozicion për çdo problematikë dhe suport ndaj çdo tatimpaguesi, duke asistuar rreth 11 773 telefonues si dhe përdorues të “live chat””, thuhet në njoftim.
Mbledhja e detyrimeve të prapambetura
Drejtoria e Përgjithshme e Tatimeve ka publikuar edhe të dhënat mbi mbledhjen e detyrimeve të prapambetura si dhe për faljen e detyrimeve në kuadër të ligjit për faljen.
“Ka vijuar sensibilizimi për të mundësuar mbledhjen e detyrimeve të prapambetura, ku gjatë kësaj periudhe numri i subjekteve që kanë reaguar pozitivisht është 2567 dhe vlera është 1 miliardë e 859 milionë lekë. Ka vijuar procesi i fshirjes automatike të detyrimeve për periudhën e përpara vitit 2010 dhe kompensimin me kredi si për periudhën para vitit 2010 dhe atë të 2011-2014, gjithashtu edhe fshirja e detyrimeve me kusht për periudhën 2011-2014 për ata tatimpagues që kanë paguar principalin. Më shumë se 28 160 tatimpagues kanë përfituar nga ky proces që vijon ende.
Si rezultat i këtij procesi shuma e detyrimeve te falura është 17. 134 miliardë lekë dhe përdorimi i kredisë për shlyerjen e detyrimeve në nivelin e principalit është në nivelin 1.697 miliardë lekë”, thuhet në postimin e Tatimeve.
os.de/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.