Mbyllet parku kombëtar i Yellowstone – Reshjet e dendura kanë shkaktuar përmbytje dhe dëme të mëdha në infrastrukturë

Parku kombëtar i Yelloustone, më antiku në botë dhe një nga më të vizituarit në Shtetet e Bashkuara të Amerikës, është mbyllur për shkak të përmbytjeve dhe rrëshqitjeve të dheut të shkaktuara nga reshjet e dendura.

I gjithë parku që mbulon një zonë prej më shumë se 9 mijë kilometrash katrorë dhe që përfshin shtetet e Uajoming, Montana dhe Idaho, do të jetë i mbyllur për vizitorët përfshirë dhe ata që kanë prenotuar më parë kampin dhe strehimin. Aktualisht ekspertët po inspektojnë dëmtimet në rrugë, ura dhe struktura të tjera. Të pesë hyrjet në park janë mbyllur. Vetëm një herë tjetër në histori kishte ndodhur, në qershor të 1988-ës, mbyllja e parkut. Atëherë për shkak të disa zjarreve si pasojë e një rrufeje.

Në deklaratën e fundit të menaxherëve të parkut thuhet se për momentin nuk rezultojnë viktima apo të plagosur. Pjesa veriore e parkut kombëtar të Yelloustone ndoshta do të qëndrojë e mbyllur për një kohë të gjatë për shkak të dëmeve të mëdha në infrastrukturë.

Mbyllja ndodh në një moment që Yelloustone po përgatitej për të festuar 150 vjetorin e saj dhe kur komunitetet vendore që varen shumë nga turizmi, shpresonin në një rimëkëmbje pas kufizimeve të udhëtimeve si pasojë e pandemisë së Covid 19.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.