Mbyllja e Qeverisë do zgjasë – Trump: Deri sa të financohet muri. Fed e ka fajin për ekonominë
Presidenti i Shteteve të Bashkuara, Donald Trump, tha se mbyllja e pjesshme e qeverisë federale do të vazhdojë deri sa kërkesa e tij për të financuar murin të plotësohet. Qeveria e Shteteve të Bashkuara u mbyll pjesërisht ditën e Shtunë dhe nuk ka ende asnjë shenjë të përpjekjeve për të rihapur agjencitë.
“Nuk mund të them se kur do të hapet qeveria. Por mund të them se do të vazhdojë kështu deri sa të kemi një mur, gardh, apo çfarëdo emri që t’i vënë. Unë e quaj një barrierë nga njerëzit që dynden në vendin tonë në mënyrë të jashtëligjshme, nga droga, nga trafiku njerëzor.
Ne nuk mund t’i arrestojmë këto njerëz po nuk patën një mur. Nëse nuk e kemi murin, qeveria nuk do të hapet”, tha Trump. Financimi për thuajse 25% të programeve federale, përfshirë Sigurinë brenda vendit, Departamentin e Drejtësisë dhe Bujqësisë, skadoi në mesnatën e së Premtes.
Pa një marrëveshje, mbyllja ka gjasa të shtyhet deri për Vit të Ri. Ndërtimi i murit ka qenë një nga premtimet më të theksuara të Trump gjatë fushatës së tij, por Demokratët e kanë kundërshtuar ashpër. Presidenti përsëriti gjithashtu se Rezerva Federale po rrit normat e interesit shumë shpejtë. Megjithatë, ai tha se kompanitë amerikane janë më të mirat në botë dhe ofrojnë një mundësi të jashtëzakonshme për blerje për investitorët. Trump shtoi se ka besim të Sekretari i Thesarit, Steven Mnuchin.
“Kam besim te Steven Mnuchin, është i talentuar. Fed po rrit normat e interesit shumë shpejtë, për shkak se mendon që ekonomia është në perofrmancë të mirë. Presidenti Obama e kishte më mirë. Është shumë më e thjeshtë të drejtosh kur ke norma interesi shumë të ulëta.”
Aksionet amerikane kanë rënë ndjeshëm në javët e fundit prej shqetësimeve mbi ekonominë amerikane. Trump ka fajësuar kryesisht Rezervën Federale për luhatjet në bursa. Të tre indekset kryesorë në SHBA ranë me më shumë se 2% ditën përpara pushimeve për Krishtlindje.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.