“Mbyllja e sporteleve, diskriminim” – Qytetarët, ankesa te Komisioneri, Gajda: Po i shqyrtojmë. Ka shumë elemente që tregojnë se po penalizohen
Pamundësia për të marrë shërbime online përmes portalit e-Albania konsiderohet si diskriminim nga ana e qytetarëve. Disa ankesa janë depozituar pranë Komisionerit për Mbrojtjen nga Diskriminimi, i cili thotë se qytetarët janë mbështetur nga organizata të shoqërisë civile për të kryer ankesën.
Pavarësisht se ende nuk ka një vendim përfundimtar, Gajda thotë se paraprakisht ka një sërë elementësh që tregojnë se mbyllja e sporteleve fizike penalizon një sërë kategorish qytetarësh.
Sipas Gajdës, në rast se institucioni që ai drejton do të arrijë në përfundimin se ofrimi i shërbimeve vetëm përmes e-Albania përbën diskriminim, atëherë do të kërkohet ndërhyrja e qeverisë, që normalisht ka të gjitha mundësitë për ta korrigjuar vendimin.
Ndalimi i diskriminimit është një prej të drejtave dhe lirive themelore të njeriut, që sanksionohet edhe në Kushtetutën e Shqipërisë. Sipas nenit 18 të ligjit më të rëndësishëm të vendit: Askush nuk mund të diskriminohet padrejtësisht për shkaqe të tilla si gjinia, raca, feja, etnia, gjuha, bindjet politike, fetare a filozofike, gjendja ekonomike, arsimore, sociale ose përkatësia prindërore.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.