“Mbyllje shkollash në bazë qyteti” – ISHP, Simaku: Skenar që nuk përjashtohet. Vlerësimi sipas infektimeve të nxënësve dhe mësuesve
Teksa pritet një rritje e rasteve të reja me COVID-19, ekspertët e Institutit të Shëndetit Publik nuk përjashtojnë mundësinë e mbylljes së kopshteve dhe shkollave në nivel qyteti, duke kaluar në mësim online. Epidemilogu në ISHP, Artan Simaku thotë për TV SCAN se vlerësimet bëhen në baza 2-javore, ndërkohë që vendimi do të merret nga Komiteti Teknik i Ekspertëve, bazuar në të dhënat e infektimeve të nxënësve dhe mësuesve.
Simaku thotë se trendi në rritje i të prekurve nga infeksioni do të vijojë, ndërsa piku parashikohet të arrihet në fillim të muajit shkurt. Bazuar në të dhënat e infektimeve, emidemilogu thotë se aktualisht në vendin tonë po dominon varianti Omicron, ndërsa apelon për vaksinim.
Sipas të dhënave të Ministrisë së Shëndetësisë në të gjithë vendin numërohen rreth 23 mijë raste ackive. Qarku me numrin më të madh të rasteve aktive është Tirana, me gati gjysmën e të infekturave, ndërsa më pas vjen Fieri dhe Elbasani. Ndërkohë që, qarqet me më pak raste aktive janë Korça, Dibra dhe Kukësi.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.