Me maska në rrugë, ka edhe të pabindur – Vëzhgimi / Shumë qytetarë pa barriera mbrojtëse, por rriten përdoruesit

E enjtja shënoi hyrjen në fuqi të masave të reja anticovid, që detyrojnë qytetarët të mbajnë maska  apo barriera mbrojtëse edhe në ambientet e jashtme.  Në një vëzhgim të realizuar nga TV SCAN, në krahasim me ditët e mëparshme, në rrugët e kryeqytetit u vu re një shtim i njerëzve që i kishin vendosur këto pajisje mbrojtëse.

Por, pavarësisht kësaj shumë qytetarë të tjerë dolën në rrugë pa maska, duke shkelur detyrimin e qeverisë.

Po ashtu, shumë të tjerë nuk kishin të mbuluar hundën dhe gojën, në kundërshtim me udhëzimet për mbajtjen e maskës apo barrierës mbrojtëse.

Ndërkaq, në rrugë kishte forca të shtuara të policisë së shtetit, të cilët kanë të drejtë të vendosin gjoba në rast të shkeljes së këtij detyrimi.

Edhe nëpër bare u vu re se jot ë gjithë frekuentuesit e mbanin maskën, ndonëse udhëzimi i Instituti të Shëndetit Publik kërkon mbajtjen e saj vetëm para dhe pas konsumit të pijes.

Sipas rregullave të reja maska duhet të mbahet në çdo ambient të jashtëm nga personat mbi 11 vjeç. Përjashtim bëjnë disa rasteve specifike e më konkretisht, kur përdorimi i maskës dëmton shëndetin sipas rekomandimit të mjekut të familjes, nga persona me sëmundje që i bëjnë të paaftë për përdorimin maskës, gjatë ushtrimit të aktiviteteve sportive apo nga persona të cilët lëvizin të vetëm me biçikletë, motoçikletë apo monopatinë. Sipas Aktit Normativ të qeverisë, mos mbajtja e maskës në ambiente të jashtme dënohet me gjobë 3 mijë lekë për shkelësit për herë të parë, dhe 5 mijë lekë për shkelje të përsëritur.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.