Më pak familje “me shtëpi” – Po rritet numri i shqiptarëve që jetojnë me qira

Gjithnjë e më pak familje shqiptare kanë një shtëpi të tyren dhe gjithnjë e më shumë prej tyre banojnë me qira. Sipas të dhënave nga Instituti i Statistikave, në vitin 2016, 91.8% e familjeve të anketuara jetonin në shtëpinë e tyre. Kjo përqindje është në rënie gjatë viteve të fundit.

Në vitin 2014, familjet që deklaronin se jetonin në shtëpinë e tyre ishin 94% e numrit total. Paralelisht, është rritur pesha e familjeve shqiptare që jetojnë në banesa me qira, që ka arritur në 6.3% të totalit, nga 4.1% që kishte qenë në vitin 2014.

Rënia e përqindjes së familjeve që e kanë banesën në pronësinë e tyre mund të shpjegohet me disa faktorë, duke filluar nga efekti i periudhës së krizës. Rritja e ngadaltë e të ardhurave dhe shtrëngimi i kredisë bankare, deri para pak vitesh, e bënë më të vështirë blerjen e një shtëpie.

Gjithashtu, forcimi i kontrollit mbi territorin e ka reduktuar fenomenin e ndërtimeve pa leje, që ka qenë masiv në periudhën e tranzicionit dhe ka siguruar strehim për qindra mijëra familje. Një faktor tjetër janë lëvizjet e vazhdueshme demografike drejt qendrave të mëdha urbane.

Jo të gjitha familjet që zhvendosen drejt qyteteve të mëdhenj, ku çmimet e pronave janë më të larta, kanë mundësi të blejnë një banesë. Kjo vlen sidomos për të rinjtë që shkëputen nga familjet dhe zhvendosen për të punuar në kryeqytet.

Gjithashtu, të ardhurat nga emigracioni gjatë viteve të krizës ekonomike kanë zbritur në nivele më të ulëta, duke pakësuar investimet për blerje pronash nga emigrantët dhe familjet e tyre.  Nga ana tjetër, evolucioni shoqëror ka bërë që për një pjesë të individëve dhe familjeve jetesa me qira të jetë edhe një zgjedhje.

Ndonëse në mentalitetin e shoqërisë shqiptare prirja për të patur një shtëpi në pronësi ngelet mbizotëruese, ka më shumë njerëz që nuk e shohin më këtë si një domosdoshmëri, apo të paktën jo si një nevojë të ngutshme.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.