Më pak fonde për rrugët – Deri në 2024-ën do financohet vetëm sinjalistika e Kardhiq-Delvinë, fondet e tjera për PPP-të

Shpenzimet buxhetore për programin e transportit rrugor parashikohet të pësojnë një rënie gjatë 2 viteve të ardhshëm, për t’u rikthyer në të njëjtët nivele, të vitit aktual, në 2024-ën. Sipas programit buxhetor afatmesëm, për vitin 2021 fondet e buxhetit për financimin e këtij programi ishin 26.22 mld lekë. Ndërkohë që, për vitin 2022 parashikohet një rënie e tyre, duke arritur në 20.83 mld lekë. Për vitin 2023 shpenzimet buxhetore për transportin rrugor parashikohet të jenë 25.41 mld lekë, ndërsa për vitin 2024, 26.39 mld lekë.

Sipas treguesve të performancës, në programin buxhetor afatmesësm, në 3 vitet e ardhshëm, qeveria do të financojë drejtpërdrejt nga buxhetit i shtetit vetëm lotin 8 të rrugës Kardhiq-Delvinë , që përfshin rishikimin dhe plotësimin e sinajlistikës nga Loti 1 deri në Lotin 7, si dhe rrugën lidhëse Shijan-Ura e Gajdarit dhe rehabilitimi i segmentit rrugor Shijan-Delvinë. Ndërkohë që, pjesa më e madhe e buxhetit duket se do të shkojë për financimin e kontratave të partneritetit-publik privat për ndërtimin e rrugëve. Sipas dokumentit, numri i kilometrave të ndërtuara, rehabilituara, sistemuara, asfaltuara dhe të pajisura me sinjalistikë rrugore do të arrijë në 602 km në vitin 2022, nga 308 km që pritet të ndërtohen deri në fund të vitit 2021.

Ndërkaq, një nga treguesit e performances është edhe rritja e sigurisë rrugore në të gjitha akset kombëtare ku synohet ulja e numrit të aksidenteve me pasojë humbje jetë njerëzisht dhe numri i pikave të zeza me 25%, sipas Strategjisë Komëbatre të Transportit. Këto ndërhyrje do të vijnë në një kohë kur të dhënat zyrtare nga Instituti i Statistikave tregojnë se për 7-mujorin e këtij viti ka një rritje të numrit të aksidenteve rrugore, si dhe numrit të të aksidentuarve dhe të vdekurve si pasojë e tyre.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.