Më pak ndërtime informale – Raporti, 169 objekte pa leje në Tiranë, 125 të dënuar

Numri i ndërtimeve pa leje ka ardhur në rënie gjatë katër viteve të fundit. Prokuroria e Tiranës raporton se vitin e shkuar ka hetuar në kryeqytet 169 raste ndërtimesh të paligjshme.

103 prej ndërtimeve nën hetim janë dërguar në gjykatë. 125 persona kanë rezultuar përgjegjës për veprën e ndërtimit të paligjshëm dhe janë dënuar sipas përcaktimeve të Kodit Penal.

Shifra është në rënie prej 34% krahasuar me një vit më parë. Sipas të dhënave të prokurorisë, në vitin 2015 në kryeqytet u hetuan në total 258 ndërtime pa leje. 185 prej rasteve u dërguan në gjykatë, e cila dënoi 139 persona.

Volumi i ndërtimeve pa leje në kryeqytet ka ardhur në rënie vit pas viti, ndërkohë që e njëjta tendencë në ulje raportohet nga autoritetet përgjegjëse edhe në gjysmën e parë të vitit 2017.

Tirana është edhe qyteti më i prekur nga fenomeni i ndërtimeve pa leje. Vetëm në verën e vitin 2013 Prokuroria vuri nën hetim 4 mijë ndërtime pa leje në kryeqytet. Në total, numri i objekteve pa leje të ndërtuar në gjithë territorin vlerësohet rreth 427 mijë.

Lorenc Rabeta/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.