Më shumë buxhet për kulturën. Të thithen talente dhe investime të huaja – KiE propozon strategjitë për Shqipërinë

Këshilli i Europës ka përgatitur një raport për të mbështetur Ministrinë e Kulturës në Shqipëri të zhvillojë vizionin e saj strategjik.

Sektori kulturor në Shqipëri ka mbetur shumë prapa, shkruhet në raport, si pasojë e investimeve të pakta, izolimit artistik gjatë periudhës së komunizmit dhe mospërshtatjes së institucioneve me rolin që duhet të kenë në shekullin e 21-të. Nëse vendi arrin të zhvillojë një identitet të qartë kulturor, kjo mund ta bëjë Shqipërinë më tërheqëse dhe të identifikueshme nga turistët e huaj.

Pasi bën një analizë të anëve të forta dhe të dobëta të sektorit kulturor, KiE bën disa rekomandime për masat që duhen marrë.

Kryesorja sipas raportit është të rriten shpenzimet për Artin dhe Kulturën. Aktualisht ato zënë 0.3% të Buxhetit të Shtetit, por duhet të arrijnë një minimum prej 1%. Për të siguruar financime sugjerohet propozimi i projekteve pranë Bankës Europiane për Rindërtim dhe Zhvillim dhe ngritja e një skeme me incentiva për të tërhequr investime vendase dhe të huaja në industrinë e kulturës si muzika, filmi dhe lojërat.

Linja e dytë e veprimit ka të bëjë me ngritjen e kapaciteteve, ku KiE rekomandon ngritjen e një dege master në menaxhimin e bizneseve artistike dhe kulturore. Inkurajohet gjithashtu pjesëmarrja në programe trajnimi nga ana e të rinjve dhe mësuesve.

Në linjën e tretë synohet përmirësimi i mjedisit rregullator. Propozohet ngritja e një skeme taksash për të inkurajuar investimet në prodhimin e serialeve televizive apo filmave. Në fushën e prodhimit Shqipëria ka kosto shumë të ulëta, por ndodhet në dizavantazh me vendet fqinje, të cilat ofrojnë skema të tilla për investitorët.

Dy drejtimet e tjera ku duhet të përqendrohet vizioni kulturor sipas KiE janë ndërtimi i një strategjia komunikimi dhe ndërkombëtarizimi i sektorit kulturor. Shqipëria duhet të promovojë sa më mirë ofertën e saj kulturore për botën e jashtme, por edhe të thithë talente të huaja përmes programeve të rezidencave.

Në përfundim, raporti i Këshillit të Europës inkurajon aplikimin me projekte në programin e radhës të fondeve IPA nga BE, të cilat parashikojnë një fond prej 46 milionë eurosh në fusha prioritare si turizmi, trashëgimia kulturore dhe sipërmarrja.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.