Më shumë “pesha të rënda” – Pas shitblerjeve, vetëm një bankë ka ngelur “e vogël”

Procesi i shitblerjeve dhe bashkimeve ka krijuar banka më të mëdha dhe, në teori, më konkurruese. Të dhënat nga Shoqata Shqiptare e Bankave për tremujorin e tretë evidentojnë një fakt interesant: tashmë, sistemi bankar shqiptar ka vetëm një bankë të vogël, sipas standardeve që aplikohen nga Banka e Shqipërisë, që klasifikon si të tilla bankat me më pak se 2% pjesë tregu. Në fund të muajit shtator, sektori bankar kishte vetëm një bankë të këtyre përmasave: Banka e Bashkuar e Shqipërisë, me 0.6% të aktiveve të tregut.

Bankat e tjera tashmë janë të gjitha sipër kufirit të 2% dhe klasifikohen si banka të mesme ose të mëdha. Në dy vitet e fundit, bankat më të vogla dolën nga tregu duke shitur aksionet te konkurrentët më të mëdhenj, siç ishte rasti i Veneto Banka dhe Bankës Ndërkombëtare Tregtare. Ndërkohë, Banka e Kreditit të Shqipërisë vendosi të mbyllë aktivitetin përmes likuidimit. Banka e fundit që deri para pak muajsh klasifikohej si e vogël, Fibank, ka ndryshuar kategori falë rritjes së shpejtë të përmasave në vitet e fundit dhe tashmë mban rreth 2.1% të tregut.

Procesi i konsolidimit, që zgjati disa vite me radhë, e uli numrin e bankave nga 16 në 12. Bashkimet, si në rastet Intesa-Veneto, ABI Bank – NBG Bank dhe Union Bank – Banka Ndërkombëtare Tregtare, sollën krijimin e bankave më të mëdha.

Konsolidimi përmes bashkimit ka qenë një politikë e nxitur nga rregullatorët në të gjithë Europën, për të krijuar banka më të forta dhe më të shëndetshme.

Në analizën e Bankës së Shqipërisë, kjo do të krijojë premisat për një konkurrencë më të lartë dhe një përmirësim të ritmeve të kredidhënies. Një pjesë e madhe e bankave, sidomos ato që kishin vendosur të largoheshin nga tregu, prej vitesh pothuajse e kishin stopuar kreditimin, pa pasur më një rol aktiv në nxitjen e konkurrencës. Shitja e tyre dhe krijimi i bankave me më shumë fuqi tregu dhe ambicie më të mëdha për t’u rritur pritet ta rigjallërojë konkurrencën dhe të shtojë ofertën për kredi bankare.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.