Më shumë se 2 milion njerëz testohen për COVID-19 në Pekin

Më shumë se dy milion njerëz në Pekin janë testuar për koronavirus gjatë dy javëve të fundit, raporton media shtetërore kineze Global Times.

Ajo vjen pasi një valë e re e virusit shpërtheu në qytet, që mendohet të ketë origjinën në një treg ushqimesh me shumicë. Më shumë se 200 njerëz janë infektuar në Pekin midis 11-20 qershorit, dhe mediat shtetërore thanë se “shumica [ishin] të lidhura me tregun Xinfadi në rrethin Fengtai të Pekinit”.

Raporti thoshte se pas testeve, “shumë prej tyre iu kërkua të karantinohen në shtëpi”, megjithëse nuk jep ndonjë shifër.

Pekini ngriti përgjigjen e urgjencës në Nivelin II në 16 qershor. Shkollat u pezulluan dhe disa punonjësve u është thënë që të punojnë nga shtëpia.

Të Shtunën, një ekip me 70 persona, staf mjekësor nga Provinca Hubei mbërriti në Pekin me tren me shpejtësi të lartë për të mbështetur qytetin në trajtimin e shpërthimit të tij të ri.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.