Megaplatforma me 13 milionë studentë në mbarë botën – Ja cila është lënda më e ndjekur që nga shpërthimi i COVID-19

Me një të tretën e popullsisë globale që jeton në izolim, shumë po i drejtohen shkencës që përgjigjet se si të jesh i lumtur në këto periudha të vështira. Në mbrëmjen e 26 Marsit, 1.3 milion njerëz u regjistruan në një kurs online të Universitetit Yale me titull: Shkenca e Mirëqenies. Studimi i lumturisë mund të mos jetë fusha e parë që ju bie në kokë kur mendoni për shkencë, por ka një interes të pamohueshëm publik, veçanërisht që nga fillimi i Covid-19.

Nga fillimi i dhjetorit deri më 26 mars, numri i nxënësve të regjistruar nga SHBA është rritur me 295%, sipas Yale. Ndërsa SHBA përbëjnë shumicën e studentëve, Kanadaja, Mbretëria e Bashkuar dhe India gjithashtu hyjnë tek pesë të parët. Dhjetëra vende dhe rajone nga vijnë nxënësit kanë më shumë se dyfishuar regjistrimin e tyre në të njëjtën kornizë kohore. Faqja e regjistrimit ka mbi 13 milion shikime të fundit.

Profesoresha Laurie Santos, e cila ligjëron kursin në internet dhe në kampus, thotë se ishte jashtëzakonisht e popullarizuar kur ajo për herë të parë ua ofroi studentëve të universitetit, duke u bërë klasa më e madhe ndonjëherë në historinë 300-vjeçare të Yale. Gati një e katërta e gjithë trupit studentor po e merrte atë, i tha ajo BBC-së.

“Kjo më bëri të kuptoj se kishte vërtet një treg për këtë përtej kampusit tim,” thotë Prof Santos. Kur platforma e arsimit në internet Coursera publikoi një version dixhital në 2018, ai u bë një nga klasat më të mëdha edhe atje. “Ajo që është veçanërisht e “çmendur” janë tre javët e fundit – nga Marsi 2018 deri në fund të Shkurtit 2020 kemi pasur rreth 500,000 nxënës, por vetëm në tre javët e fundit ne kemi më shumë se dyfishuar atë.” “Kemi pasur 300,000 regjistrime gjatë fundjavës,” shton ajo, me studentë që vijnë nga të gjitha sferat e jetës, nga ofruesit e kujdesit shëndetësor deri tek punonjësit e burgjeve.

Rritja e studentëve të rinj mund të jetë për shkak të instinktit tonë për të kërkuar zgjidhje dhe mënyra për të marrë kontrollin në kohë krize, si dhe falë kohës shtesë që ata kanë ngecur brenda shtëpive. “Është një veprim i marrjes së kontrollit mbi shëndetin tuaj mendor, dhe duke e bërë atë në një mënyrë të bazuar në prova,” thotë Prof Santos.

Këshilla për të qenë  më të lumtur tani

Neuroshkencëtarja Emiliana Simon-Thomas jep mësim një kurs edX mbi shkencën e lumturisë që është marrë nga mbi gjysmë milioni studentë globalisht, këtu janë tre këshillat e saj të para:

1. Ndërgjegjshmëria e plotë me atë që na rrethon

“Mjaftojnë 5 minuta për të vërejtur ndjesinë në trupin tuaj dhe ndjesitë përreth jush. Duke krijuar një ndërgjegjësim të plotë në momentin që po përjetoni, duke u përpjekur të mos i dorëzoheni vazhdimisht dëshirës për të parë para ose pas në kohë”.

2. Lidhu me të tjerët

“Kalimi i kohës duke folur qëllimisht me të tjerët për përvojën tuaj, përvojën e tyre dhe nëse mundeni, edhe për atë çfarë po shkon mirë. Është e pamundur të mos ndjeheni të shqetësuar, por a mund të pyesni dikë, çfarë ju pëlqeu sot? A ishte uji i nxehtë në dushin tuaj? ? Një bisedë veçanërisht interesante apo ndonjë video që keni parë që ishte me të vërtetë e bukur dhe pozitive? ”

3. Praktikoni mirënjohjen

“Shkruaj qëllimisht në një ditë të caktuar se çfarë ka shkuar mirë dhe kush ka ndikuar në të. Ndonjëherë nuk është bashkëshorti juaj ose fqinji juaj, por dikush që nuk e dini, i cili mund të ketë korrur frutat që ju hani. Ndjenja e njerëzimit të përbashkët në këtë kohë është e rëndësishme dhe një mënyrë për të njohur potencialin tonë për të kapërcyer këtë sfidë si një komunitet “.

Ndërsa mund të duket e çuditshme të marrësh një qasje shkencore ndaj lumturisë, procesi i përgjithshëm i studimit është i drejtpërdrejtë: studiuesit studiojnë njerëz të lumtur, studiojnë sjelljet e tyre dhe provojnë nëse njerëzit e pakënaqur mund të përmirësojnë mirëqenien e tyre duke bërë të njëjtën gjë.

Në thelb, shumë nga konceptet tona bazë të asaj që na bën të lumtur janë të pasakta, shpjegon Prof Santos. “Ne mendojmë se lumturia vjen nga rrethanat tona, sasia e parave që marrim, pasuritë tona materiale. Studentët e kolegjit tim mendojnë se notat e përsosura janë të barabarta me lumturinë. Por ajo që tregon studimi është se ky nuk është realiteti.” (BBC)

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.