Menaxhimi i mbetjeve urbane – Klosi: Sistem të unifikuar për kostimin dhe tarifimin e tyre në të gjitha bashkitë
Tashmë të gjithë qytetarët do të paguajnë për mbetjet urbane mbi një sistem të unifikuar dhe transparent. Këtë parashikon projektligji i kosto-tarifës së mbetjeve urbane, përgatitur nga Ministria e Turizmit dhe Mjedisit, i cili ka për qëllim vendosjen e rregullave të barabarta. Ministri Blendi Klosi ka prezantuar sot projektligjin kryetarëve të bashkive të vendit.
Sipas Klosit, formula e përgatitur nga ekspertët do të mundësojë transparencë në llogaritjen e kostove të menaxhimit të mbetjeve urbane.
“Është e papranueshme që në vitin 2018 të kemi një sistem të çorganizuar të trajtimit të kostove dhe tarifave të trajtimit të mbetjeve urbane duke sjellë kosto të ndryshme nga një bashki në tjetrën, ndaj përgatitja e një formule nga ekspertët e fushës do të bëjë të mundur që të kemi transparencë në llogaritjen e kostove të menaxhimit të mbetjeve urbane, të kemi projekte të qarta e të mbrojtura si dhe kontrata të përcaktuara në bazë të normave dhe standardeve”- u shpreh ai.
Rritja e shkallës së mbrojtjes së mjedisit, zbatimi i standardeve më të mira për menaxhimin këtyre mbetjeve si dhe planifikimi më i mirë i menaxhimit në tërësi janë edhe ato të cilat pritet të mundësojë ky sistem i unifikuar i kostimit dhe tarifimit të mbetjeve urbane.
Më tej, gjatë diskutimit me kryetarët e bashkive, Klosi shprehu domosdoshmërinë e përcaktimit të një harte të landfilleve dhe zonave të grumbullimit të mbetjeve në vendin tonë. Po ashtu, ai kërkoi edhe angazhimin e pushtetit vendor në zbatimin me sukses të fushatës “Clean and Green 2020”.
“Mendoj që ka ardhur koha që të kemi një sistem të unifikuar, ku të futen të dhënat e secilës bashki, se jo të gjitha kanë të njëjtat problem, por ne e kemi shumë të nevojshme, që së bashku me ju, në një operacion që e kemi nisur tashmë në bashkëpunim të ngushtë me prefektët për të përcaktuar edhe një hartë të landfilleve dhe të zonave të vendgrumbullimit të mbetjeve në Shqipëri.”
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.