Merkel flet për Brexit – “Mund të arrihet marrëveshja në Tetor nëse Britania qartëson kërkesat”

Kancelarja gjermane Angela Merkel tha se arritja e një marrëveshjeje mes Britanisë dhe Bashkimit Europian është e mundur në muajin Tetor, por nuk është ende e qartë se çfarë kërkon qeveria britanike.  Në një konferencë në Gjermani, Merkel tha se Mbretëria e Bashkuar nuk mund të zgjedhë të jetë pjesë e tregut të përbashkët pa respektuar të gjithë rregullat.  Qeveria britanike kërkon të kontrollojë numrin e qytetarëve europian që lëvizin drejt vendit.

Gjatë një takimi të kabinetit ditën e Hënë, Qeveria e kryeministres Theresa May, ra dakord që punëtorët europian duhet të përballen me të njëjtat rregulla të emigrimit si qytetarët që nuk janë pjesë e Bashkimit Europian. Shumë analistë kanë argumentuar se kufizimi i emigrantëve europian do të dëmtojë ekonominë Britanike. Merkel tha se bizneset europiane kërkojnë qartësi, gjë që përkthehet në punë të vështirë për negociatorët e Brexit në 8 javët e ardhshme.

Ka pasur komente nga të dyja anët e Brexit se negociatat duhet të intensifikohen, në mënyrë që të arrihet një marrëveshje në Nëntor.  Megjithatë analistët janë skeptikë.  Sipas bankës zvicerane UBS, ndërkohë që çdo ditë kalon pa ndodhur progress, rreziku i mos arritjes së një marrëveshje që do të godasë ekonominë është shtuar.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.