Merkel përballë kritikave – Mbron lëshimet e bëra ndaj SPD, përfshirë ministrinë e Financave
Angela Merkel mbrojti lëshimet e “dhimbshme” që i bëri social demokratëve për të fituar mandatin e saj të katër si Kancelare e Gjermanisë dhe tha se kritikat nga konservatorët e saj nuk janë shenja të zbehjes së autoritetit të kancelares. Ndërsa pyetej nëse po planifikon të përgatisë një pasues për të drejtuar konservatorët e saj në zgjedhjet e tjera, Merkel tha se kërkon që një gjeneratë më e re e kristian demokratëve të saj të mbushë postet ministrore në një koalicion të ri me SPD.
Në një intervistë në televizionin publik “Zweites Deutsches Fernsehen”, Merkel komentoi pakënaqësitë te konservatorët e saj mbi vendimin për t’i dhënë social demokratëve ministrinë e Financave. “E kuptoj zhgënjimin. Tashmë duhet të tregojmë se mund ta nisim me një ekip të ri. Kemi 6 poste ministrorë për të mbushur dhe sipas meje mund të konsiderohen edhe persona më të rinj”, tha Merkel. Kancelarja pësoi një disfatë në zgjedhjet e Shtatorit, ku konservatorët e saj humbën mbështetje në një kohë të rritjes së partisë së djathtë ekstreme, ndërkohë që votuesit kishin në mendje vendimin e saj në 2015-ën, ku mirëpriti më shumë se 1 milionë emigrantë.
Në Nëntor, përpjekjet e saj për të formuar një Qeveri me dy parti të tjera dështoi, duke e çuar vendin drejt një “ngërçi” politik. Javën e kaluar, ajo arriti një marrëveshje me social demokratët për të risjellë aleancën që ka qeverisur Gjermaninë që prej vitit 2013, ndërkohë që pranoi kërkesa të dhimbshme nga partia e Martin Schulz.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.