Merkel refuzon kuotën për makina elektrike të kërkuar nga rivali në zgjedhje

Kancelarja gjermane Angela Merkel ka refuzuar të shtunën propozimin e bërë nga rivalët Social Demokratë për të futur kuota për makinat elektrike në Eurupë. Sipas saj, implementimi i target-ëve të këtij lloji do të ishte shumë i komplikuar.

Sfiduesi kryesor në zgjedhjet e 24 shtatorit Martin Schulz kërkoi që këto kuota të zbatohen si në Gjermani ashtu edhe në Bashkimin Europian, pasi do të nxistin industrinë drejt inovacionit.

“Nuk mendoj se kuotat për makinat elektrike, për këtë teknologji, janë të mirë menduara. Pastaj do të duhej ta diskutonim me vite të tëra në Europë. Çfarë do të bënim nëse diçka e tillë nuk do të ngjiste? A nuk do të shiteshin më makinat me motorë nafte?” tha Merkel gjatë një takimi me përkrahës të partisë së saj në Dortmund.

Në vend të këtij propozimi, Merkel kërkon një strategji më të madhe për të ndihmuar industrinë e automjeteve të bëjë tranzicionin drejt prodhimit të makinave elektrike.

“Ne duhet të inovojmë me shpejtësi. Atje ku kompanitë s’mund të menaxhojnë të vetme, qeveria duhet t’i qëndrojë nga pas dhe t’i ndihmojë”, tha kancelarja që kandidon për një mandat të katërt.

Industria e automjeteve është eksportuesi më i madh në Gjermani dhe siguron 800 mijë vende pune. Megjithatë frika e politikanëve është se prodhuesit nuk po bëjnë mjaftueshëm për të investuar në teknologjinë dhe infrastrukturën e re.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.