Merkel, vizitë në Kinë – Bën thirrje për luftën tregtare. Mirëpret investimet kineze në Gjermani
Kancelaria gjermane, Angela Merkel, tha në nisje të vizitës në Pekin se lufta tregtare mes Kinës dhe Shteteve të Bashkuara po ndikon në të gjithë botën dhe shtoi se duhet një rezolutë së shpejti.
Firmat gjermane kanë hasur vështirësi nga konfliktet tregtare, ndërkohë që ekonomia është tkurrur dhe eksportet kanë rënë, ç’ka ka shtuar shqetësimet për recesion.
Megjithatë, ndërkohë që presidenti Donald Trump i ka kërkuar kompanive amerikane që të mbyllin operacionet kineze dhe të nisin prodhimin brenda vendit, Merkel kërkon të nisë një fazë të re të marrëdhënies mes Bashkimit Europian dhe Kinës.
“Shpresojmë që të arrihet një zgjidhje në konfliktet tregtare me Shtetet e Bashkuara, pasi po na ndikon të gjithëve”, tha Merkel në nisje të vizitës dy-ditore në Kinë.
Dy superfuqitë do të nisin bisedimet për tregtinë këtë muaj. Merkel ka bërë thirrje për marrëveshje të investimeve mes Pekinit dhe Europës, pavarësisht se Washingtoni ka gjetur zgjidhje me tarifa për praktikat e padrejta tregtare të kinës.
Aleatët Europianë, përfshirë Gjermaninë , kanë të njëjtin këndvështrim mbi këto praktika të kinës, por nuk kanë gjetur zgjidhje nëpërmjet tarifave. Merkel tha se Gjermania është e hapur ndaj investimeve kineze dhe se mirëpret të gjithë kompanitë kineze që të investojnë në vend.
Megjithatë, ajo shtoi se Gjermania do të kontrollojë investimet në sektorë të caktuar strategjikë.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.