“Merrni dozën e dashurisë” – Shtëpia e Bardhë, bashkëpunim me aplikacionet e takimeve online
Shtëpia e Bardhë dëshiron ti bindë të rinjtë amerikanë të marrin dozat e vaksinës. Ekipi kundër Covid-19 njoftoi se Shtëpia e Bardhë po zhvillon bashkëpunimet me aplikacionet e takimeve online, si OKCupid, Tinder dhe Bumble për të inkurajuar më shumë amerikanë të vaksinohen kundër virusit, që ka vrarë me qindra mijëra njerëz vetëm në SHBA.
“Më në fund kemi gjetur një mjet që na bën më tërheqës ndaj vaksinimit”, deklaroi këshilltari i Shtëpisë së Bardhë, Andy Slavitt, gjatë një konference për mediat me anëtarët e ekipit kundër Covid-19. Aplikacionet e takimeve online do të ofrojnë karakteristika të reja duke përfshirë, dokumentet që tregojnë statusin e të vaksinuarit, qasje falas në përmbajtjet premium të aplikacioneve për personat e vaksinuar dhe mënyra për të filtruar lidhjet e mundshme të njerëzve që kanë statusin e të vaksinuarit.
Presidenti amerikan, Joe Biden, ka vendosur objektivin për të vaksinuar 70% të të rriturve amerikanë me të paktën një dozë të vaksinës. Për të arritur këtë objektiv, ndërkohë që programi i vaksinimit është ngadalësuar ndjeshëm, Shtëpia e Bardhë njoftoi bashkëpunimet edhe me kompanitë e shërbimeve të transportit të pasagjerëve, si Uber dhe Lyft.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.