Mesi në Mal të Zi – Diskuton për menaxhimin e ujërave ndërkufitare
Zëvendëskryeministrja, Senida Mesi zhvilloi të martën një vizitë zyrtare në Mal të Zi, ku u prit nga Ministrja për Administratën Publike, Suzana Pribilović dhe Zëvendëskryeministri për Politikat Ekonomike dhe Sistemin Financiar, Milutin Simović.
Me homologun malazez, zëvendëskryeministrja Mesi u ndal tek projektet me interes të ndërsjellë mes dy vendeve dhe më konkretisht, mbi negocimin e kushteve tregtare mes Shqipërisë dhe Malit të Zi, si dhe mbi veprimet konkrete që duhen ndërmarrë për liqenin e Shkodrës dhe lumin Buna, në kuadër të marrëveshjes së nënshkruar në mbledhjen e përbashkët të dy qeverive lidhur me menaxhimin e burimeve ujore ndërkufitare. Të dyja palët ndanë bindjen e plotë se rezultatet e para të kësaj marrëveshjeje do të pasojnë së shpejti.
Gjatë takimit me Ministren për Administratën Publike, Suzana Pribilović, është diskutuar kryesisht për nevojën e shkëmbimit të përvojave reciproke mes dy vendeve në fushën e administratës publike dhe asaj të shërbimeve publike. Gjithashtu, fokus i bisedës ka qenë edhe bashkëpunimi rajonal, si dhe sfidat e përbashkëta të Shqipërisë dhe Malit të Zi në rrugëtimin evropian.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.