“Mësimdhënia të jetë e kombinuar”, Ekspertët: Të mos përjashtohet mësimi online, duhen investime në platforma që rrisin aksesin
Pavarësisht se qeveria ka vendosur që vitit shkollor 2020-2021 do të zhvillohet pranë insitucioneve arsimore, ekspertët e arsimit thonë se mësimdhënia duhet të jetë e kombinuar me atë në distancë, në mënyrë që të garantohet cilësia, por edhe ruajtja e shëndetit të mësuesve dhe nxënëse. Në një prononcim për TV SCAN kryetarja e Sindikatës së Pavarur të Arsimit Shqiptar për Tiranën, Alma Lama thotë se për mirëmenaxhimin e mësimdhënies, mësimi online nuk duhet të përjashtohet.
Sipas Lamës, mësimi online mundëson reduktimin e kohëzgjatjes së orëve të mësimit, ndërsa paralelisht duhen marrë edhe disa masa shtesë për të evituar grumbullimet e nxënësve.
Po ashtu, sipas kryetares së sindikatës është domosdoshmëri investimi nga ana e Ministrisë së Arsimit, Sportit dhe Rinisë në ngritjen e një platforme online, që krijon akses për të gjithë mësuesit, nxënësit dhe prindërit.
Ky sugjerim vjen edhe pas eksperiencës së krijuar gjatë muajve të karantinës, ku sipas Lamës jo të gjithë nxënësit patën akses.
Lama nuk lë jashtë përgjegjësisë as institucionet e qeverisjes vendore, të cilët kanë përgjegjësinë për furnizimin e shkollës me materiale të ruajtjes së higjienës personale.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.