Meta, apel qeverisë për borxhin: ‘Mos bëni gallata me ekonominë, jemi në situatë kritike’!
Presidenti Iilir Meta i bën apel qeverisë të jetë e kujdesshme me borxhin publik dhe të marrë masa për shlyrjen e tij, pasi në të kundërt rrezikojmë faliment si shtet. Në një konferncë për mediat, kreu i shtetit theksoi se rritja e borxhit është në interes të një grupi të caktuar njerëzish, ndërkohë që është një problematikë shumë e madhe për familjet shqiptare.
Ai u shpreh se: ‘Duhet të gjithë të marrin seriozisht çështjen e situatës me borxhin, mos të bëjnë sikur nuk shikojnë, edhe faktorët që pretendojnë se janë në opozitë. Është në interes të një grupi të caktuar në qeveri, që ka kapur shtetin, për të fshehur të vërtetat. Është edhe në interes të një grupi oligarkësh, që përfitojnë shumë nga kjo situatë, por është një dramë në rritje për shumicën e familjeve shqiptare. Prandaj, shikoni këto tregues me qetësi, ku jemi ne, ku janë të tjerët këtu pranë nesh. Duhet të thellohemi të gjithë, sepse është borxhi i qytetarëve, që të mos përfundojmë si ndonjë vend tjetër e të dalim në falimentim’.
Për presidentin Meta, niveli i borxhit në rreth 81 për qind tw PBB është këmbanë alarmi për vendin.
“Të mos i ngatërrojmë temat. E patë shumë qartë që këto tregues janë një kambanë e fortë alarmi për vendin, tregojnë qartë që jemi në një situatë tepër kritike dhe jo të shëndetshme ekonomiko-financiare. Të heqim dorë nga gallatat me ekonominë, me financat, aq më tepër me borxhet. Është edhe Japonia që e ka borxhin shumë herë më të madh, por treguesit e Japonisë janë të tjerë dhe investitorët më të mëdhenj në botë luftojnë për ta blerë borxhin e Japonisë më shumë dëshirë. Koha e gallatës duhet të marrë fund dhe koha e ndëshkimit duhet të fillojë shumë shpejt. Jam i sigurt edhe për këtë çështje”, tha ai.
Niveli aktual i borxhit publik në vend, regjistrohet në rreth 81 për qind, i cili u rrit edhe për shkak të Eurobondit të marrë së fundmi, ndërkohë që në periudhën afatmesme 3 vjeçare parasgikohet ulja e tij në 76 për qind të PBB.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.