Meta – Chiti/ Senatit Italian mbështetje për procesin e integrimit të Shqipërisë në BE
Kryetari i Kuvendit, z. Ilir Meta, priti në një takim Kryetarin e Komisionit të Politikave të BE në Senatin e Republikës së Italisë, z. Vannino Chiti.
Gjatë takimit, Kryetari i Kuvendit, z. Meta, vlerësoi marrëdhëniet e shkëlqyera mes Shqipërisë dhe Italisë, si edhe theksoi rëndësinë e forcimit të bashkëpunimit midis Kuvendit të Shqipërisë dhe Senatit të Italisë.
Nga ana tjetër, z. Vannino Chiti konfirmoi vullnetin e Senatit Italian për të intensifikuar bashkëpunimi me Kuvendin e Shqipërisë edhe në të ardhmen. Senatori Chiti shprehu edhe një herë mbështetjen e Senatit Italian për procesin e integrimit të Shqipërisë në Bashkimin Evropian.
“Kemi marrë sigurinë e Senatorit Chiti dhe të gjithë delegacionit për të vendosur një raport më të ngushtë me Kuvendin e Shqipërisë dhe me komisionin përkatës, në mënyrë që Italia të vazhdojë të shtojë rolin e saj në mbështetje të integrimit evropian të Shqipërisë, si gjithmonë”, tha Meta.
“Ndërmjet Italisë dhe Shqipërisë dihet që ka marrëdhënie të konsoliduara historikisht miqësie, janë në të tashmen, dhe duam t’i forcojmë për në dobi të së ardhmes. Ne mbështesim integrimin evropian të Shqipërisë dhe të gjithë vendeve të Ballkanit në brendësi të Bashkimit Evropian dhe besojmë që të vazhdojmë ta mbështesim këtë bashkëpunim do të jetë edhe më e lehtë edhe rruga drejt së ardhmes”, deklaroi Senatori Chiti.
Eralda Zito/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.