Meta dekreton ministër të Brendshëm Sandër Lleshajn – Çfarë ndodhi në “ngërçin” dyjavorë
Pas një ngërçi prej dy javësh, dhe ku ministria e Brendshme ishte pa drejtues, në limitet e fundit të afatit kohor, Presidenti Ilir Meta dekreton Sandër Lleshajn ministër të Brendshëm.
Çfarë ndodhi në ngërçin dyjavorë?
Më datën 27 Tetor ish ministri i Brendshëm Fatmir Xhafaj jep dorëheqjen nga posti i tij. Në të njëjtën ditë u publikua edhe zëvendësi i Xhafajt. Largimin nga detyra të Fatmir Xhafaj dhe emrin e Sandër Lleshajt e bën publike nëpërmjet një statusi në twitter kryeministri Edi Rama.
“Pranova dorëheqjen e ministrit Xhafaj, të cilin e falënderoj për kontributin e çmuar. Gjeneral Sandër Lleshi do të sjellë një energji të re pozitive në krye të Punëve të Brendshme. Traseja është e shtruar. Tani duhet rritur shpejtësia dhe duhen arritur rezultate edhe më domethënëse”, shkruante Rama.
Emir i Lleshajt u dërgua pranë institucionit të Presidencës, ku u refuzuar dekretimi më datë 3 Nëntor, sërish në limitet e afatit kohor, me arsyetimin se “Presidenti i Republikës, Sh.T.Z Ilir Meta nuk ka krijuar bindjen e plotë për t’i dhënë besimin kandidaturës së Z.Sandër Lleshaj si Ministër i Brendshëm”.
Nga kjo ditë pati një sërë debatesh e përplasjes mes institucioneve Kryeministri-Presidencë. Pas mos dekretimit kryeministri Rama e emëron Sandër Lleshajn zëvendësministër i brendshëm me kompetenca të ministrit. Njoftim ky i bërë nga kryeministri më datën 5 Nëntor.
“Dakordësi e plotë në Grupin Parlamentar. Kuvendi do të miratojë nesër dekretin e Presidentit për shkarkimin e ish-ministrit të brendshëm. Sandër Lleshi do të marrë drejtimin e MB si zëvendës ministër. Por nuk mbaron me kaq. Për më shumë do t’i drejtohem Kuvendit nesër në 10.00”.
Por Rama nuk u ndal për të bërë Lleshajn ministër. Më datën 9 Nëntor rifirmos dhe i ridërgon të njëjtin emër për dekretim presidentit Meta.
“Sapo kam rifirmosur për ridërgim kërkesën për dekretimin e Sandër Lleshit Ministër i Brendshëm, drejtuar Presidentit të Republikës. Bashkëngjitur do t’i dërgohet Presidentit edhe një relacion i detajuar shpjegues, në funksion të dekretimit të Ministrit të Brendshëm”, shkruan Rama.
Dy ditë më vonë, më 11 Nëntor Presidenca bën publike pyetjet drejtuar Ministrisë së Mbrojtjes për rastin e Leshajt, ku ndër të tjera thuhej se një gjeneral nuk mund të jetë ministër I brendshëm.
“Duke qenë se kandidatura e Sandër Lleshaj vjen nga një karrierë e gjatë ushtarake në zbatim të Kushtetutës së Republikës së Shqipërisë, ku ministri si funksion kushtetues është autoritet civil në zbatim të neneve 69, 103, 167/1 të Kushtetutës emërimi i tij në detyrën e ministrit të Brendshëm paraqet një problematikë themelore kushtetuese. Kjo sepse ushtarakët e shërbimit aktiv nuk mund të zgjidhen ose të emërohen në detyra të tjera shtetërore dhe as të marrin pjesë në parti apo veprimtari politike, ndërkohë që një ushtarak i shërbimit aktiv nuk mund të kandidojë dhe as të zgjidhet ministër apo deputet pa hequr dorë më parë nga detyra, shkruan Meta.
Në një reagim të menjëhershëm të po asaj dite, Lleshaj i dërgon një letër presidentit Meta, ku shpreheshe se ka hequr dorë nga karriera ushtarake për t’u bërë ministër.
Dekretimi i Sandër Lleshajt erdhi pasi Presidenti pranoi dorëheqjen e tij si ushtarak aktiv. Për vonesën e dekretimit presidenti Meta ka dhënë përgjigje në një dalje televizive në Klan.
“Dje kam gjetur (15 Nëntor) shkresën zyrtare që bënte propozimin për lirimin si gjeneral nga ministria e Mbrojtjes. Nëse do ma kishin sjellë që herën e parë do e kisha bërë. Dekretimi pa lirimin si gjeneral do të ishte shkelje e hapur kushtetuese. Për mua kjo ishte arsye kushtetuese”, u shpreh kreu i shtetit mbrëmjen e së Premtes në Zonë e Lirë.
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.