Meta kthen ligjin e metrologjisë – “Shërbimi publik do i jepet privatit pa konkurrencë, cënon interesat e qytetarëve”
Presidenti Ilir Meta ka kthyer për rishqyrtim në Kuvend ligjin “Për metrologjinë”, duke e cilësuar është një ndër ligjet me përmbajtje më të lartë antikushtetutshmërie, si dhe në shkelje flagrante të parimeve themelore kushtetuese të funksionimit të tregut të lirë dhe konkurrues. Sipas Metës, ligji i ri synon që të lerë në dorë të privatit kontrollin e instrumenteve matës, ndonëse mbikëqyrja e tregut dhe inspektimi metrologjik janë funksione shtetërore që garantojnë saktësinë e tyre.
Sipas presidentit, lënia në dorë të subjekteve private, në mënyrë të pakontrolluar, cenon direkt këtë funksion publik, i cili në mënyrë të pashmangshme do të sjellë hapësira për abuzime që sjellin si pasojë dëmtimin e interesave të qytetarëve dhe të interesit publik. Gjithashtu, sipas presidentit përmes ligjit të ri lihet hapësirë e gjërë për përcaktimin me subjektivizëm të tarifave të shërbimeve të ofruara nga subjekti privat, kur ky lloj shërbimi është i detyrueshëm me ligj dhe kërkon që tarifat të përcaktohen në mënyrë të tillë që të mos kthehen në kosto të tepërt për përdoruesit fundorë të shërbimit.
Sipas argumenteve, që shoqërojnë kthimin e ligjit në Kuvend, qëllimi real i ligjit nr. 126/2020, nuk është rregullimi i sistemit të njësisë së matjes dhe kontrollit metrologjik, por privatizimi i shërbimeve të detyrueshme publike, pa asnjë kriter dhe pa asnjë kontroll. Për këtë arsye, përveçse kërkon rishikimin e ligjit, Meta i bën thirrje edhe Prokurorisë së Posaçme kundër Korrupsionit dhe Krimit të Organizuar (SPAK), të fillojë kryesisht hetimet pasi sipas tij “kemi të bëjmë me rastin më flagrant të keqpërdorimit të procesit legjislativ”.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.