Meta kthen ligjin për të huajt: Nxit shpopullimin! – Presidenca: Kërkon vetëm të lehtësojë procedurat për punëtorë nga vendet e tjera
Presidenca ka kthyer për rishqyrtim në Kuvend Ligjin për të Huajt duke ngritur akuza të forta ndaj Qeverisë, se qëllimi në vetvete i tij është plotësimi sa më lehtë I boshllëqeve të krijuara nga largimi i shqiptarëve. Në relacionin shpjegues, zyra e Presidentit vëren se Ligji I ri për të Huajt zëvendëson të mëparshmin që ishte votuar në vitin 2013, pa një debat public dhe pa bërë të qarta qëllimet e vërteta të Qeverisë.
Nga shqyrtimi i dispozitave të ligjit nr. 79/2021, shkruan zyra e Presidentit, duket sikur qeveria shqiptare, nën ombrellën deklarative se përmes këtij ligji nuk po bën asgjë tjetër përveçse po traspozon direktivat e Bashkimit Evropian, në realitet po përmbush vetëm një qëllim parësor dhe afat shkurtër, atë të plotësimi të atyre boshllëqeve që po krijon largimi masiv i shtetasve shqiptarë me shtetas të huaj, duke u fokusuar më shumë tek fuqia punëtore që mund të ofrojnë shtetasit e vendeve të treta.
“Nëse ky është qëllimi real i qeverisë Shqiptare, ky qëllim duhet shprehur hapur dhe kjo çështje kërkon diskutim të gjerë dhe gjithëpërfshirës, pasi nëse një masë e tillë ligjore nuk mendohet mirë, atëherë mund të krijohen pasoja shumë të rënda, riparimi i të cilave kapërcen disa fish mandatin e një Kuvendi apo një shumice qeverisëse”, shkruan Presidenca.
Ndaj është shumë e nevojshme që këto dispozita të ligjit nr. 79/2021, që synojnë të krijojnë lehtësira jo proporcionale për punësimin e të huajve në Shqipëri, të rishikohen pasi nuk mbajnë aspak në konsideratë problematikat dhe aktualitetin social dhe ekonomik të vendit dhe në këtë mënyrë është krejtësisht i paqartë efekti që mund të vijë nga zbatimi i tyre, thekson zyra e Kreut të Shtetit.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.