Meta takon kreun e ri të KLSH-së: “Institucioni, të funksionojë i pavarur dhe i pandikuar politikisht”
Presidenti i Republikës Ilir Meta, priti në një takim Kryetarin e sapozgjedhur të Kontrollit të Lartë të Shtetit, Arben Shehu me rastin e fillimit të ushtrimit të detyrës prej tij. Sipas njoftimit nga zyra e shtypit të Presidentit, Meta teksa i ka uruar suksese në detyrën e tij, i kërkoi zotit Shehu, që veprimtaria e KLSH të funksionojë në mënyrë të pavarur dhe të pandikuar politikisht.
“Kontrolli i Lartë i Shtetit është institucioni më i lartë kushtetues i kontrollit ekonomik dhe financiar dhe veprimtaria e këtij institucioni duhet të shërbejë veç të tjerave edhe në rritjen e përgjegjshmërisë së çdo institucioni publik në menaxhimin e pasurisë publike, pa asnjë dallim, duke nisur nga Institucioni i Presidentit të Republikës”, – theksoi Kreu i Shtetit.
Ndërkohë Shehu, e garantoi Presidentin për ushtrimin me transparencë të funksioneve kushtetuese të institucionit për të cilin është votëbesuar ta drejtojë, në mënyrë profesionale dhe të depolitizuar.
Nertila Doko/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.