Meta vizitë në Baku: “Vendet e zhvilluara të mirëpritura për investime në Ballkan”
Integrimi i tregjeve rajonale dhe heqja e kufijve dhe barrierave artificiale, janë dy elementë, të cilët, sipas presidentit Ilir Meta, sjellin suksesin e ekonomive të vendeve të Ballkanit. Në fjalën e mbajtur në “Forumin e 6-të Gobal” në Baku, Meta i bëri thirrje vendeve të zhvilluara të investojnë në rajonin e Ballkanit.
“Në kohën e globalizimit, suksesi i ekonomive tona do të garantohet kur tregjet rajonale të integrohen shpejt dhe kur investimet e huaja nuk njohin kufij dhe barriera artificiale. Në kushtet e një tregu ballkanik dhjetëra milionësh konsumatorë, nuk duhet të humbasin energji për tu përplasur me njëri-tjetrin, duke fragmentizuar tregun dhe duke dobësuar ekonomitë tona. Konkurrencën nuk e kemi me njëri-tjetrin, apo brenda rajonit tonë, por me kohën dhe sfidat e globalizimit. Ballkani ka qënë ndër shekuj dhe do të jetë “nyjë lidhëse” e Lindjes me Perëndimin, duke shtuar se, ne inkurajojmë dhe mirëpresim investime nga të gjitha fuqitë emergjente ekonomike.
Meta theksoi se, projekti i përbashkët në rajon, pavarësisht ndasive dhe konflikteve të së kaluarës, është integrimi në Bashkimin Evropian.
“E ardhmja e përbashkët e qytetarëve tanë në Ballkan, varet nga vetë vendet tona, nga aftësia jonë për t’iu përgjigjur sfidave të së ardhmes me më shumë zhvillim dhe prosperitet për popujt tanë”,.
Presidenti Meta u ndal edhe në projektin madhor TAP, duke theksuar se “realizimi i gazsjellësit është një kontribut jo vetëm për stabilitetin dhe sigurinë rajonale, por edhe me impakt strategjik për interesat ekonomike dhe të sigurisë energjetike të vetë BE-së”.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.