Meta viziton Beratin: Do të jetë gjithmonë një nga qendrat më të bukura e tërheqëse
Presidenti i Shqipërisë Ilir Meta, vizitoi Beratin në “Ditën Kombëtare të Trashëgimisë Kulturore”, ku deklaroi se për shkak të qytetërimit mijëravjeçar, ky qytet do të jetë përherë për ne një nga qendrat më të bukura e më tërheqëse.
“Do të jetë gjithmonë në vëmendjen tonë dhe për fat të mirë edhe të mbarë botës, përfshirë edhe UNESCO-n, pikërisht për shkak të qytetërimit mijëravjeçar që përfaqëson dhe që ruan. Qyteti i bukurisë monumentale, i traditave më të shquara të pikturës, të zejeve, të këngëve, të valleve dhe kostumeve popullore, por dhe të kishave dhe xhamive të magjishme. Një xhevahir i shndritshëm i kulturës sonë kombëtare”.
Meta tha se kremtimi i Ditës së Trashëgimisë sonë Kombëtare në të njëjtën datë me atë të Trashëgimisë Evropiane është dëshmia e qartë për të ecur në një hap me trendin e zhvillimit kulturor, evropian.
“Në këtë udhëtim mijëravjeçar ne jemi krenarë për auticitetin tonë, për gjuhët dhe traditat tona, ashtu sikurse ndihemi të vetëdijshëm edhe për kulturën, identitetin tonë perëndimor, si dhe harmonizimin e tyre me ndikimin e kulturave të tjera përreth”.
Presidenti Meta së bashku me Ministren e Kulturës, Mirela Kumbaro Furxhi dhe kryetarin e Bashkisë së Beratit Petrit Sinaj vizituan Muzeun “Onufri”, dhe më pas muzeun etnografik ku u njohën me historinë e themelimit të saj, objektet kryesore si dhe vlerat historike e arkitekturore të monumenteve të shumta e të lashta të qytetit të Beratit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.