Metsola, presidente e Parlamentit Europian – Eurodeputetja e djathtë malteze merr 458 vota, nga 690 të pranishëm në sallë
Roberta Metsola, anëtare e grupit të krahut të djathtë EPP nga Malta, është zgjedhur mesditën e së martës presidente e Parlamentit Europian. Ajo mori 458 vota, nga 690 eurodeputetë të pranishëm në sallë. Metsola ishte mes katër kandidatëve për këtë pozicion, së bashku me Sira Rego të Spanjës (radikalja e majtë), Kosma Zlotoëski e Polonisë (ECR, Euroskeptikët) dhe Alice Bah Kuhnke e Suedisë (të Gjelbërit). Eurodeputetja malteze pason në këtë detyrë David Sassolin, i cili ndërroi jetë më 11 janar dhe mandati i të cilit përfundoi këtë javë.
Në këtë mënyrë, Metsola është gruaja e tretë që do të kryesojë asamblenë prej 705 anëtarësh, pas Simone Veil të Francës (1979-1982) dhe Nicole Fontaine (1999-2002).
Metsola është eurodeputete që nga viti 2013 dhe nënkryetare e Parlamentit që nga viti 2020. Ligjvënësja konservatore së fundmi fitoi shikueshmëri duke marrë detyrën nga Sassoli, i cili mungoi në sallë për disa javë për shkak të sëmundjes.
Por nëna e katër fëmijëve ka tërhequr gjithashtu kritika nga disa prej kolegëve të saj për pikëpamjet e saj kundër abortit, të cilat mbahen gjerësisht në Maltë, vendi i fundit i BE-së ku aborti është ende plotësisht i paligjshëm. E vetëdijshme për rezervat që ka ngjallur për këtë çështje, ajo siguroi se nëse zgjidhet, “detyra e saj do të jetë të përfaqësojë qëndrimin e Parlamentit”, duke përfshirë edhe të drejtat seksuale dhe riprodhuese.
Sipas rregullores së parlamentit, presidenti ka një sërë kompetencash, duke përfshirë vendosjen për pranueshmërinë e teksteve dhe amendamenteve të paraqitura në kuvend për votim, përveç drejtimit të debateve. Presidenti gjithashtu përfaqëson institucionin në samitet europiane të 27 shteteve anëtare.
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.