Mikroplastikat në det, rreziku i organizmave të vegjël deri në vitin 2100
Mikroplastikat e shpërndara në oqeane kanë efekte jashtëzakonisht negative në jetën e organizmave të vegjël detarë, duke rrezikuar ciklin jetësor të të gjitha specieve dhe funksionin e tyre rregullator të ekosistemit global.
Rezultat i kërkimit “Plastikat, polimerët dhe cikli i tyre i dukshëm biogjeokimik”, një studim i spektroskopisë infra të kuqe mbi foraminiferat. Botuar nga revista “Enviromental Pollution” dhe nënshkruar nga Giovanni Battista De Giudici, Carla Buosi dhe Daniela Medas, specialistë të Departamentit të Shkencave Kimike dhe Gjeologjike të Universitetit të Cagliarit me disa studiues nga universitete të tjera.
Aktiviteti u përqendrua në efektet e mikroplastikave të prodhuara në mënyrë industriale (që përmbajnë plastifikuesin DEHP) në lëvozhgat dhe citoplazmën e foraminiferave, organizmave detarë njëqelizorë, të pranishëm kudo në det që përfaqësojnë një nga hyrjet e zinxhirit ushqimor. Një efekt pozitiv i pranisë në det të shumë specieve të foraminiferës përcaktohet nga guaska e tyre e karbonatit të kalciumit e cila ndihmon në rithithjen e CO2 atmosferik.
Rezultatet e hulumtimit tregojnë se mikroplastikat janë të pranishme në guaskën dhe qelizën e foraminiferës së analizuar. Duke studiuar spektrin përbërës të qelizave, u tregua për herë të parë që prania e plastikës shkakton stres qelizor në këto mikroorganizma.
Për më tepër, plastifikuesi DEHP është i përfshirë në qelizë dhe gjithashtu në guaskë.
“Këto vëzhgime na bëjnë të mendojmë se ndotja kimike e kombinuar me acidifikimin e ujit mund të çojë në zhdukjen e foraminiferës deri në vitin 2100. Foraminiferat janë një komponent themelor i ekosistemit dhe biodiversitetit, bollëku i tyre është thelbësor për rezistencën mjedisore në lidhje me ndryshimet globale”, – shpjegon De Giudici. (ANSA)
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.