Miliarderët po “luten” që të taksohen – Të pasurit e SHBA i dërgojnë letër kandidatëve presidencialë
Disa miliarderë në Shtetet e Bashkuara, i kanë bërë thirrje kandidatëve që do garojnë për zgjedhjet presidenciale të vitit 2020, që të rrisin taksat ndaj më të pasurve. “Amerika ka një përgjegjësi morale, etike dhe ekonomike që të taksojë më shumë pasurinë tonë”, shkruante letra e nënshkruar nga të paktën 20 amerikanë super të pasur, përfshirë George Soros dhe Abigail Disney, trashëgimtaren e pasurisë së Walt Disney. Miliarderët theksuan nevojën për të trajtuar rritjen e hendekut në pasuri mes 1%-shit dhe shumicës së qytetarëve në SHBA.
Letra sugjeronte gjithashtu përdorimin e kësaj takse për të trajtuar ndryshimin klimatik dhe aksesin në kujdesin shëndetësor. “Taksimi i pasurisë mund të trajtojë më mirë krizën klimatike, përmirësojë ekonominë dhe shëndetësinë si dhe të krijojë një mundësi për të fuqizuar liritë tona demokratike”, shkruante letra. Ndërkohë që thirrja e drejtohej të gjithë kandidatëve amerikanë, letra përmendte disa liderë demokratë, përfshirë senatoren Elizabeth Warren dhe Beto ‘Rourke të Teksasit. Sipas një raporti të Organizatës së Kombeve të Bashkuara, thuajse 41 milionë amerikanë jetojnë në varfëri, përfshirë 18.5 milionë në varfëri ekstreme.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.